រដ្ឋមន្ត្រីការបរទេសអាមេរិក លោក Marco Rubio នឹងដឹកនាំគណៈប្រតិភូអាមេរិកដ៏ធំមួយក្រុម នៅសប្តាហ៍នេះ ទៅកាន់សន្និសីទសន្តិសុខទីក្រុង Munich ជាទីដែលមេដឹកនាំអឺរ៉ុប កំពុងសង្ឃឹមថា នឹងទទួលបានភាពធូរស្បើយពីគោលនយោបាយ និងការគំរាមកំហែងមិនទៀងទាត់ របស់លោកប្រធានាធិបតី Donald Trump ដែលបង្កភាពរកាំរកូសដល់ទំនាក់ទំនងឆ្លងមហាសមុទ្រអាត្លង់ទិក និងធ្វើឱ្យសណ្តាប់ធ្នាប់អន្តរជាតិក្រោយសង្គ្រាមលោកលើកទី២ មានភាពរង្គោះរង្គើ។

សន្និសីទសន្តិសុខទីក្រុង Munich កាលពីឆ្នាំមុន មានការចូលរួមពីអនុប្រធានាធិបតីអាមេរិក លោក JD Vance ដែលបានវាយប្រហារដោយពាក្យសម្ដីទៅលើសម្ព័ន្ធមិត្តជិតស្និទ្ធបំផុតរបស់អាមេរិកនៅអឺរ៉ុប ដោយចោទពួកគេថាធ្វើឱ្យអរិយធម៌លោកខាងលិចគ្រោះថ្នាក់។ ក្នុងសន្និសីទនៅឆ្នាំ២០២៦នេះ ក្រុមមន្ត្រីអាមេរិក បាននិយាយប្រាប់សារព័ត៌មាន AP ថា លោក Rubio មានគម្រោងប្រើវិធីសាស្រ្តដែលមិនសូវចម្រូងចម្រាស នៅពេលលោកថ្លែងទៅកាន់កិច្ចប្រជុំប្រចាំឆ្នាំរបស់មេដឹកនាំពិភពលោក និងមន្ត្រីសន្តិសុខជាតិ នៅថ្ងៃសៅរ៍ ទី១៤ ខែកុម្ភៈ ចុងសប្ដាហ៍នេះ។

សេចក្ដីប្រកាសផ្លូវការរបស់ក្រសួងការបរទេសអាមេរិក ពីទស្សនកិច្ចរបស់លោក Rubio មិនបានលម្អិតលើដំណើរសំចតរយៈពេល ២ថ្ងៃរបស់លោក នៅទីក្រុង Munich ទេ គ្រាន់តែនិយាយថា លោកនឹងទៅទស្សនកិច្ចស្លូវ៉ាគី និងហុងគ្រី បន្ទាប់ពីនោះ។ ក្រុមមន្ត្រីអាមេរិក បាននិយាយថា ប្រមុខការទូតអាមេរិករូបនេះ មានបំណងផ្តោតលើកង្វល់រួមក្នុងសកលលោកនិងតំបន់ រួមទាំងបញ្ហានៅមជ្ឈិមបូព៌ា និងអ៊ុយក្រែន ក៏ដូចជាបញ្ហាសេដ្ឋកិច្ចជាមួយប្រទេសចិន។

ផែនការទស្សនកិច្ចលោក Rubio កើតឡើងស្របពេលភាពវឹកវរក្នុងទំនាក់ទំនងអាមេរិក-អឺរ៉ុប ជំវិញរឿងរ៉ាវជាច្រើន។ ការលើកឡើងថ្មីៗរបស់លោក Trump អំពីការដណ្តើមគ្រប់គ្រងកោះហ្រ្គីនលែន ពីដាណឺម៉ាកដែលជាសមាជិកណាតូ និងបញ្ហាផ្សេងៗទៀត បាននាំឱ្យមនុស្សជាច្រើននៅអឺរ៉ុប ចោទសួរអំពីភាពជឿជាក់របស់សហរដ្ឋអាមេរិក ក្នុងនាមជាសម្ព័ន្ធមិត្តនិងដៃគូ៕