យោធានីហ្សេរីយ៉ា និយាយកាលពីថ្ងៃពុធថា ទាហានសហរដ្ឋអាមេរិកប្រហែល ២០០នាក់ ដែលគ្រោងនឹងមកដល់ប្រទេសរបស់ពួកគេក្នុងរយៈពេលប៉ុន្មានសប្តាហ៍ទៀតនេះ នឹងមិនចូលរួមការប្រយុទ្ធនោះទេ ពោលគឺកងកម្លាំងប្រដាប់អាវុធនីហ្សេរីយ៉ា ជាអ្នករក្សាការគ្រប់គ្រងទាំងស្រុងលើការសម្រេចចិត្តសន្តិសុខទាំងអស់ ។

ការប្រកាសបែបនេះ បានកើតមានបន្ទាប់ពីសេចក្តីអត្ថាធិប្បាយពីមន្រ្តីសហរដ្ឋអាមេរិកមួយរូបកាលពីថ្ងៃអង្គារថា មន្ទីរបច្ចកោណ គ្រោងនឹងដាក់ពង្រាយទាហានរបស់ខ្លួន ដើម្បីបង្វឹកកងកម្លាំងនីហ្សេរីយ៉ាដែលប្រយុទ្ធជាមួយក្រុមជីវពល រយៈពេលប៉ុន្មានសប្តាហ៍ប៉ុណ្ណោះ ក្រោយលោកប្រធានាធិបតី Donald Trump បញ្ជាឲ្យវាយប្រហារអ្វីដែលជាគោលដៅរបស់ក្រុមរដ្ឋអ៊ិស្លាម ។

កាលពីសប្តាហ៍មុន យោធាសហរដ្ឋអាមេរិក បញ្ជាក់ថា ខ្លួនបានបញ្ជូនទាហានមួយក្រុមតូចទៅកាន់ប្រទេសនីហ្សេរីយ៉ា ដោយពួកគេពុំបានផ្តល់រឿងរ៉ាវលម្អិតនោះទេ ធ្វើឲ្យវាក្លាយជាការទទួលស្គាល់លើកដំបូងរបស់ទីក្រុងវ៉ាស៊ីនតោនចំពោះវត្តមានកងកម្លាំងរបស់ខ្លួននៅក្នុងប្រទេសមួយនេះ ចាប់តាំងពីការវាយប្រហារថ្ងៃបុណ្យណូអែល ។

លោកឧត្តមសេនីយ៍ឯក Samaila Uba គឺជាអ្នកនាំពាក្យទីបញ្ជាការក្រសួងការពារជាតិនីហ្សេរីយ៉ា និយាយប្រាប់ទីភ្នាក់ងារព័ត៌មានរ៉យទ័រថា រដ្ឋធានី Abuja បានស្នើសុំវត្តមានទាហានអាមេរិក ដើម្បីផ្តល់ការបង្វឹកបច្ចេកទេស និងការងារប្រឹក្សា នៅតាមទីតាំងជាច្រើនកន្លែង ។

លោកបន្តថា ទាហានទាំងអស់នេះ ពុំបម្រើសមត្ថភាពប្រយុទ្ធនោះទេ ហើយក៏ពុំទទួលយកតួនាទីប្រតិបត្តិការដោយផ្ទាល់នោះដែរ ។ កងកម្លាំងនីហ្សេរីយ៉ានៅតែរក្សាអំណាចបញ្ជាការទាំងស្រុង ធ្វើការសម្រេចចិត្តប្រតិបត្តិការទាំងអស់ ហើយនិងដឹកនាំបេសកកម្មណាមួយ នៅលើដែនដីអធិបតេយ្យភាពនីហ្សេរីយ៉ា ៕