ប្រធានាធិបតីអាមេរិក លោក Donald Trump បានបញ្ជាក់សារជាថ្មីនូវការព្រមានអំពីប្រតិបត្តិការ « Midnight Hammer» (ការវាយប្រហារលើទីតាំងនុយក្លេអ៊ែររបស់សហរដ្ឋអាមេរិក) បន្ទាប់ពីមានកិច្ចប្រជុំរបស់លោកជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅឯសេតវិមាន កាលពីថ្ងៃពុធ (ទី១១ ខែកុម្ភៈ ឆ្នាំ២០២៦)។

ខណៈដែលលោកបានលើកឡើងពីការវាយប្រហារតាមអាកាសរបស់សហរដ្ឋអាមេរិក កាលពីខែមិថុនាឆ្នាំមុន ដែលបានបំផ្លាញរោងចក្រនុយក្លេអ៊ែររបស់អ៊ីរ៉ង់ នៅ Natanz, Isfahan និង Fordow លោក Trump បានបញ្ជាក់ថា៖ «កាលពីលើកមុន អ៊ីរ៉ង់បានសម្រេចថា ពួកគេមិនធ្វើកិច្ចព្រមព្រៀងប្រសើរជាង ហើយពួកគេត្រូវបានវាយប្រហារដោយប្រតិបត្តិការ Midnight Hammer ជាអ្វីដែលផ្ដល់ការខូចខាតដល់ពួកគេ។ សង្ឃឹមថា លើកនេះ ពួកគេនឹងមានភាពសមហេតុផល និងទទួលខុសត្រូវជាងមុន»។ 

លោក Trump ខណៈពេលដែលចាត់ទុកកិច្ចប្រជុំរបស់លោកជាមួយលោកលោក Netanyahu ថា «មានភាពល្អប្រសើរណាស់» បាននិយាយថា មិនមានការសរុបច្បាស់លាស់នោះទេ។ លោកបានសង្កត់ធ្ងន់ថា៖ «មិនមានអ្វីដែលសម្រេចបានច្បាស់លាស់នៅឡើយទេ ក្រៅពីខ្ញុំបានទទូចថា ការចរចាជាមួយអ៊ីរ៉ង់ នឹងបន្ត ដើម្បីមើលថា តើកិច្ចព្រមព្រៀងមួយអាចសម្រេចបានដែរ ឬអត់។ ប្រសិនបើវាអាចធ្វើទៅបាន ខ្ញុំនឹងផ្ដល់ដំណឹងទៅលោកនាយករដ្ឋមន្ត្រីថា នោះនឹងជាជម្រើសអាទិភាព។ ប្រសិនបើវាមិនអាចទេ យើងគ្រាន់តែត្រូវរង់ចាំមើលថា តើលទ្ធផលអ្វីនឹងកើតមាន»។

គួរបញ្ជាក់ថា សហរដ្ឋអាមេរិក និងអ៊ីរ៉ង់ បានចាប់ផ្តើមកិច្ចចរចាក្នុងរយៈពេលប៉ុន្មានថ្ងៃថ្មីៗនេះ ដើម្បីសម្រេចបានកិច្ចព្រមព្រៀងនុយក្លេអ៊ែរ។ បើទោះបីទីក្រុងតេអេរ៉ង់បានពណ៌នាអំពីកិច្ចចរចានេះថា ជា «ការចាប់ផ្តើមដ៏ល្អ» ក៏ដោយ ក៏ទីក្រុងវ៉ាស៊ីនតោនបានអំពាវនាវឲ្យបញ្ចប់កម្មវិធីនុយក្លេអ៊ែររបស់អ៊ីរ៉ង់ រួមជាមួយនឹងការដកការគាំទ្ររបស់ខ្លួន ចំពោះ «ក្រុមប្រូកស៊ី» នៅតំបន់មជ្ឈិមបូព៌ា៕