កាលពីថ្ងៃពុធ (ទី១១ ខែកុម្ភៈ ឆ្នាំ២០២៦) ប្រទេសចិនបានចោទប្រកាន់សហរដ្ឋអាមេរិកថា កំពុងព្យាយាមចាប់ផ្ដើមការសាកល្បងនុយក្លេអ៊ែរឡើងវិញ បន្ទាប់ពីទីក្រុងវ៉ាស៊ីនតោនបានលើកឡើងថា ទីក្រុងប៉េកាំង បានធ្វើតេស្តគ្រាប់បែកនុយក្លេអ៊ែរ កាលពីឆ្នាំ២០២០។

អ្នកនាំពាក្យក្រសួងការបរទេសចិន លោក Lin Jian បានប្រាប់អ្នកសារព័ត៌មាននៅទីក្រុងប៉េកាំងថា៖ «សហរដ្ឋអាមេរិកបានបន្តបង្ខូច និងបរិហារគោលនយោបាយនុយក្លេអ៊ែររបស់ចិន ជាផ្នែកមួយនៃការរៀបចំនយោបាយរបស់ខ្លួន ដើម្បីស្វែងរកអនុត្តរភាពនុយក្លេអ៊ែរ»។

លោក Lin បានបញ្ជាក់ថា ការចោទប្រកាន់របស់សហរដ្ឋអាមេរិក ដែលថា ប្រទេសចិនបានធ្វើតេស្តអាវុធនុយក្លេអ៊ែរនៅឆ្នាំ២០២០ គឺ «គ្មានមូលដ្ឋានជាក់ស្តែងទាល់តែសោះ»។ លោកបាននិយាយថា៖ «ប្រទេសចិនប្រឆាំងនឹងការបង្កើតលេសរបស់សហរដ្ឋអាមេរិក ដែលគ្រាន់តែជាការប៉ុនប៉ងរបស់ខ្លួន ក្នុងការចាប់ផ្ដើមការសាកល្បងនុយក្លេអ៊ែរឡើងវិញប៉ុណ្ណោះ»។

ការកត់សម្គាល់នេះបានកើតឡើងបន្ទាប់ពីលោក Thomas DiNanno អនុរដ្ឋមន្ត្រីការបរទេសអាមេរិកទទួលបន្ទុកការគ្រប់គ្រងអាវុធ និងសន្តិសុខអន្តរជាតិ បានប្រាប់វេទិការំសាយអាវុធ នៅទីក្រុងហ្សឺណែវ ប្រទេសស្វីស កាលពីសប្តាហ៍មុនថា ប្រទេសចិន «បានធ្វើតេស្តអាវុធនុយក្លេអ៊ែរ កាលពីថ្ងៃទី២២ ខែមិថុនា ឆ្នាំ២០២០»។ 

លោក Lin បានបដិសេធការចោទប្រកាន់នេះ ហើយបាននិយាយថា ទីក្រុងវ៉ាស៊ីនតោនកំពុងបង្វែរការទទួលខុសត្រូវ ចំពោះការរំសាយអាវុធនុយក្លេអ៊ែរទៅឲ្យប្រទេសដទៃទៀត ដែលប្រទេសចិន «បដិសេធយ៉ាងម៉ឺងម៉ាត់»។ លោកបានបន្ថែមថា៖ «ខ្ញុំសូមសង្កត់ធ្ងន់ថា សហរដ្ឋអាមេរិក គឺជាអ្នករំខានដ៏ធំបំផុត ចំពោះសណ្តាប់ធ្នាប់នុយក្លេអ៊ែរអន្តរជាតិ និងស្ថិរភាពយុទ្ធសាស្ត្រសកល»៕