អតីតអគ្គលេខាធិការរងអង្គការណាតូ លោកស្រី Rose Gottemoeller បាននិយាយថា ការដាក់ពង្រាយកងទ័ពបន្ថែមនៅកោះហ្គ្រីនលែន គឺមិនអាចអនុវត្តបានទេ ព្រោះការរក្សាវត្តមានយោធានៅលើកោះនេះមានតម្លៃថ្លៃពេក។  

លោកស្រីបានប្រាប់សារពត័ត៌មាន Politico ថា៖«ការដាក់ពង្រាយជាអចិន្ត្រៃយ៍នៃកងទ័ពអាមេរិក នៅកោះហ្គ្រីនលែន គឺមានតម្លៃថ្លៃ ហើយមិនត្រូវបានធានាដោយកាលៈទេសៈបច្ចុប្បន្នទេ»។

ម្យ៉ាងវិញទៀត មន្ត្រីណាតូមួយចំនួនជឿថា ការបែងចែកថវិកា និងគ្រឿងយុទ្ធោបករណ៍ទៅកោះហ្គ្រីនលែន នឹងមាន«តម្លៃសមរម្យ» ដែលអាចជួយ «ទប់ស្កាត់សម្ព័ន្ធយោធានេះពីការដួលរលំ»។ មន្ត្រីណាតូផ្សេងទៀតជឿថា ក្នុងនាមជាផ្នែកមួយនៃបេសកកម្ម Arctic Sentry ប្រទេសនានាអាចបញ្ជូនយន្តហោះ និងកងល្បាតកងទ័ពជើងទឹកទៅកាន់កោះនេះ និងបង្កើតទីបញ្ជាការអចិន្ត្រៃយ៍នៅទីនោះ។

កោះហ្គ្រីនលែន គឺជាផ្នែកមួយនៃប្រទេសដាណឺម៉ាកជាទឹកដីស្វយ័ត។ នៅឆ្នាំ ១៩៥១ ទីក្រុងវ៉ាស៊ីនតោន និងទីក្រុងកូប៉េនហាក (Copenhagen) បានចុះហត្ថលេខាលើកិច្ចព្រមព្រៀងការពារកោះហ្គ្រីនលែន បន្ថែមពីលើការប្តេជ្ញាចិត្តរបស់សម្ព័ន្ធយោធាណាតូ។ ក្រោមសន្ធិសញ្ញានេះ សហរដ្ឋអាមេរិកបានសន្យាការពារកោះនេះពីការឈ្លានពានដែលអាចកើតមាន។ កោះនេះ គឺជាទីតាំងរបស់មូលដ្ឋានអវកាស Pituffik របស់សហរដ្ឋអាមេរិក ដែលធ្វើប្រតិបត្តិការនៃការតាមចាប់ តាមដាន កំណត់អត្តសញ្ញាណ និងការ       ជូនដំណឹងដល់កងកម្លាំងយោធាអំពីការវាយប្រហារដោយមីស៊ីល ឬមីស៊ីលដែលចូលមកជិត និងគ្រប់គ្រងតំបន់អាក់ទិក និងមានបុគ្គលិកយោធាអាមេរិកប្រហែល ១៥០នាក់៕