ប្រទេសលីប៊ី បានផ្តល់សិទ្ធិរុករកប្រេង និងឧស្ម័នថ្មីដល់ក្រុមហ៊ុនបរទេស ដោយមានគោលដៅកែលម្អវិស័យមួយនេះឡើងវិញ បន្ទាប់ពីសង្រ្គាមស៊ីវិលអស់រយៈពេលជាច្រើនឆ្នាំ ។

កាលពីថ្ងៃពុធម្សិលមិញ ក្រុមហ៊ុនសាជីវកម្មប្រេងជាតិលីប៊ី(NOC) បានប្រកាសលទ្ធផលជុំនៃការផ្តល់អាជ្ញាប័ណ្ណដំបូងរបស់ខ្លួន ចាប់តាំងពីឆ្នាំ ២០០៧ ។ ក្រុមហ៊ុនឈ្នះអាជ្ញាប័ណ្ណទាំងនេះ គឺក្រុមហ៊ុនប្រេងខ្នាតយក្ស Chevron របស់សហរដ្ឋអាមេរិក និងក្រុមហ៊ុនថាមពលឯកជនធំបំផុតរបស់អាហ្រ្វិក គឺក្រុមហ៊ុននីហ្សេរីយ៉ា Aiteo ។

ក្រុមហ៊ុនដេញថ្លៃផ្សេងទៀតដែលបានឈ្នះអាជ្ញាប័ណ្ណដែលជាក្រុមហ៊ុនសម្ព័ន្ធសហជីពដែរនោះ រួមមានក្រុមហ៊ុន Repsol របស់អេស្ប៉ាញ ជាមួយក្រុមហ៊ុន British Petroleum ក្រុមហ៊ុន Eni North Africa ជាមួយក្រុមហ៊ុន QatarEnergy និងក្រុមហ៊ុន QatarEnergy ជាមួយក្រុមហ៊ុនហុងគ្រី MOLGrou និងក្រមហ៊ុន Turkiye Petrolleri ។

ការផ្តល់អាជ្ញាប័ណ្ណនេះជាសញ្ញាមួយបង្ហាញពីផលប្រយោជន៍ថ្មីមួយចំនួននៅក្នុងវិស័យប្រេងលីប៊ី ដែលក្រុមវិនិយោគិនមានការព្រួយបារម្ភជាយូរមកហើយ ក្រោយប្រទេសមួយនេះ ផ្ទុះសង្រ្គាមកាលពីឆ្នាំ ២០១១ ពេលផ្តួលរំលំមេដឹកនាំកាន់អំណាចយូរលោក Muammar Gaddafi ប៉ុន្តែក្រុមអ្នកជំនាញនិយាយថា ការឆ្លើយតបមានលក្ខណៈទាបជាងការរំពឹងទុក ។

លោក Hamish Kinnear គឺជាអ្នកវិភាគនៅក្រុមហ៊ុនពិគ្រោះយោបល់ហានិភ័យ Verisk Maplecroft ដែលមានមូលដ្ឋាននៅចក្រភពអង់គ្លេស និយាយប្រាប់ទីភ្នាក់ងារព័ត៌មាន AFPថា វាទំនងថា ភាពមិនប្រាកដប្រជាអូសបន្លាយពេល ជុំវិញបញ្ហានយោបាយ និងអសន្តិសុខរបស់លីប៊ី គឺជាកត្តានាំឲ្យមានការឆ្លើយតបកម្រិតទាបជាងការរំពឹងទុកបែបនេះ ។

សូមបញ្ជាក់ថា លីប៊ីនៅតែមានការបែងចែកផ្នែកនយោបាយ រវាងគូប្រជែងរដ្ឋបាលនៅតំបន់ភាគខាងកើត និងតំបន់ភាគខាងលិច ហើយជម្លោះបញ្ហាធនាគារកណ្តាល និងប្រាក់ចំណូលប្រេង តែងតែបង្អាក់ផលិតកម្មនៅតាមតំបន់ប្រេងសំខាន់ៗ ៕