អំឡុងខែមករា លោក Tunde Agando បានជិះទូកវិលត្រឡប់ទៅកាន់សហគមន៍ផ្ទះបណ្តែតទឹក Makoko របស់លោកវិញ នៅប្រទេសនីហ្សេរីយ៉ា ក្រោយដឹកម្តាយរបស់ទៅផ្សារ ពេលដែលរូបលោកឃើញគ្រឿងចក្រ កំពុងកម្ទេចផ្ទះគ្រួសាររបស់លោក ។

អ្នកស្រុកខឹងសម្បារនាំគ្នាបញ្ឈប់គ្រឿងចក្រពីការកម្ទេចផ្ទះរបស់ពួកគេ ប៉ុន្តែក្រុមនគរបាលដែលឈរជើងនៅទីនោះ បានបាញ់ឧស្ម័នបង្ហូរទឹកភ្នែកលើពួកគេ ។

លោក Agando វ័យ ៣០ឆ្នាំ ដែលបច្ចុប្បន្នគ្មានផ្ទះសម្បែងរស់នៅនោះ និយាយថា ពួកយើងសម្រាកលើកន្ទេលនៅក្រៅផ្ទះបូជាចារ្យរបស់ពួកយើង ពេលដែលពួកយើងព្យាយាមស្វែងរកទ្រព្យសម្បត្តិ បាត់បង់ ។ លោកថា រោងកាត់សក់ប្អូនប្រុសរបស់លោកក៏ត្រូវបានកម្ទេចចោលផងដែរនៅថ្ងៃបន្ទាប់ ។

លោក Agando ស្ថិតនៅក្នុងចំណោមប្រជាពលរដ្ឋរាប់ពាន់នាក់រស់នៅក្នុងសហគមន៍ផ្ទះបណ្តែតទឹក ដែលត្រូវគេបណ្តេញចេញទាំងបង្ខំពីផ្ទះរបស់ពួកគេ ដោយរដ្ឋបាលរដ្ឋ Lagos នៅក្នុងប្រតិបត្តិការកម្ទេចផ្ទះសម្បែងដែលបានចាប់ផ្តើមកាលពីចុងខែធ្នូ ឆ្នាំ ២០២៥ ហើយនិងទើបតែបញ្ចប់ នៅពេលដែលសភារដ្ឋ Lagos បញ្ជាឲ្យបញ្ឈប់ នាដើមខែនេះ ។

រដ្ឋាភិបាលនីហ្សេរីយ៉ា និយាយថា ការកម្ទេចផ្ទះសម្បែងនេះ ត្រូវបានធ្វើឡើងដោយសារសហគមន៍មួយនេះ ស្ថិតនៅជិតខ្សែអគ្គិសនី ហើយពលរដ្ឋត្រូវការផ្លាស់ទីនៅឆ្ងាយចម្ងាយ ១០០ម៉ែត្រ ។

ទោះបីជាយ៉ាងណាក៏ដោយ អង្គការក្រៅរដ្ឋាភិបាល ដែលធ្វើការជាមួយសហគមន៍ផ្ទះបណ្តែតទឹក Makoko និយាយថា ការកម្ទេចផ្ទះសម្បែងនេះ ធ្វើឡើងចន្លោះចម្ងាយ ២៥០ម៉ែត្រ និង ៥០០ម៉ែត្រ ចូលទៅក្នុងសហគមន៍ផ្ទះបណ្តែតទឹក ដោយបានបំផ្លិចបំផ្លាញផ្ទះសម្បែងប្រជាពលរដ្ឋជាច្រើនខ្នង ធ្វើឲ្យអ្នកស្រុករាប់ពាន់នាក់ គ្មានផ្ទះសម្បែងរស់នៅ និងបណ្តាលឲ្យមនុស្ស ១២នាក់ស្លាប់ រួមទាំងទារក ២នាក់ផងដែរ ៕