ប្រធានាធិបតីម៉ិកស៊ិកលោកស្រី Claudia Sheinbaum និយាយកាលពីថ្ងៃពុធថា ប្រទេសរបស់លោកស្រី នឹងបញ្ជូនការដឹកជញ្ជូនលើកទី ២នូវជំនួយមនុស្សធម៌ដល់ប្រទេសគុយបា ក្នុងរយៈពេលប៉ុន្មានថ្ងៃខាងមុខនេះ ស្របពេលកង្វះខាតប្រេងឥន្ធនៈធ្ងន់ធ្ងរ បានធ្វើឲ្យប្រទេសកោះមួយនេះ ដាច់ចរន្តអគ្គិសនីញឹកញាប់ ហើយនិងផ្អាកជើងហោះហើរ ។

កាលពីចុងសប្តាហ៍កន្លងទៅ នាវា ២គ្រឿងដឹកគ្រឿងផ្គត់ផ្គង់ទម្ងន់ជាង ៨០០តោន បានចាកចេញពីប្រទេសម៉ិកស៊ិក ធ្វើដំណើរទៅកាន់ប្រទេសគុយបា ខណៈប្រទេសនៅអាមេរិកខាងជើងមួយនេះ បន្តវាយតម្លៃលើវិធីសាស្រ្តបញ្ជូនប្រេងឥន្ធនៈទៅកាន់ប្រទេសគុយបា ដើម្បីជួយឲ្យប្រទេសកោះមួយនេះ ឈានដល់តម្រូវការមូលដ្ឋាន ដោយពុំបង្កការសងសឹកពីទីក្រុងវ៉ាស៊ីនតោន ដែលបានគំរាមដំឡើងពន្ធលើប្រទេសផ្គត់ផ្គង់ប្រេងដល់គុយបា ។

លោកស្រី Sheinbaum និយាយប្រាប់សន្និសីទសារព័ត៌មានថា ថ្ងៃស្អែកនេះ ពេលនាវាត្រឡប់មកវិញការដឹកជញ្ជូនលើកទី ២ នឹងត្រូវធ្វើឡើង ។ លោកស្រីបន្តថា រដ្ឋាភិបាលរបស់លោកស្រីនឹងជួយក្រុមសង្គមស៊ីវិលដែលដើរប្រមូលជំនួយសម្រាប់ប្រទេសគុយបា ៕