លោក Samer Khawaireh គឺជាអ្នកសារព័ត៌មានមួយរូបរបស់ប៉ាឡេស្ទីនមកពីទីក្រុង Nablus ស្ថិតក្នុងតំបន់កាន់កាប់វ៉េសប៊ែង ដែលត្រូវបានឃាត់ខ្លួនកាលពីខែមេសា ឆ្នាំមុន ហើយនិងបានចំណាយពេល ៩ខែនៅក្នុងពន្ធនាគារអ៊ីស្រាអែល ។ លោកបានជាប់ពន្ធនាគារដោយពុំមានការចោទប្រកាន់អ្វីនោះឡើយពីតុលាការអ៊ីស្រាអែល ។

លោកនិយាយប្រាប់ទីភ្នាក់ងារព័ត៌មានរ៉យទ័រថា រូបលោកទទួលបានអាហារតិចតួចបំផុតនៅក្នុងពន្ធនាគារ Megiddo and Nafha របស់អ៊ីស្រាអែល ។

លោក Khawaireh និយាយថា លោកទទួលបាននំបុ័ងស្តើងៗចំនួន ៨ចំណិត ក្នុង ១ថ្ងៃ និងសាច់ត្រីតិចតួច ២លើក ក្នុង ១សប្តាហ៍ ។

បុរសវ័យ ៤៩ឆ្នាំរូបនេះ បញ្ជាក់ថា លោកស្រកគីឡូទម្ងន់ ២២គ.ក អំឡុងពេលចាប់ខ្លួន និងការដោះលែង ។ លោកថា លោកស្គមឡើងកូនប្រុសអាយុ ៩ឆ្នាំរបស់លោកមើលលែងស្គាល់រូបលោក ។

រឿងរ៉ាវរបស់លោក Khawaireh កើតមានឡើង រយៈពេល ៥ខែ ក្រោយតុលាការកំពូលអ៊ីស្រាអែលសម្រេចឲ្យពន្ធនាគារនៅក្នុងប្រទេសមួយនេះ ផ្តល់អាហារគ្រប់គ្រាន់ដល់អ្នកទោសប៉ាឡេស្ទីន ហើយបញ្ជាឲ្យស្ថានភាពក្នុងពន្ធនាគារ ល្អប្រសើរជាងមុន ។ ប៉ុន្តែសម្រាប់អ្នកទោសដូចជារូបលោក Khawaireh នៅតែអត់ឃ្លាន និងរងការបំពានដដែល ។

សេវាកម្មពន្ធនាគារអ៊ីស្រាអែល បដិសេធន៍ពុំធ្វើសេចក្តីអត្ថាធិប្បាយចំពោះរឿងរ៉ាវរបស់លោក Khawaireh ប៉ុន្តែពួកគេបានច្រានចោលការចោទប្រកាន់ពីការបង្អត់អាហារ ឬការធ្វេសប្រហែសជាប្រព័ន្ធ ។ ពួកគេបន្តថា អាហារូបត្ថម្ភ និងការថែទាំសុខភាព ត្រូវបានផ្តល់ជូន ដោយផ្អែកលើស្តង់ដាអាជីព និងនីតិវិធីប្រតិបត្តិការ ៕