អគ្គរដ្ឋអាជ្ញាវ៉េណេស៊ុយអេឡា លោក Tarek William Saab បាននិយាយកាលពីថ្ងៃពុធ (ទី១១ ខែកុម្ភៈ ឆ្នាំ២០២៦) ថា ការលើកលែងទោសដែលត្រូវបានគ្រោងទុក សម្រាប់អ្នកទោសនយោបាយ និងអ្នកដែលបានចាប់អ្នកទាំងនោះដាក់ពន្ធននាគារ ក្នុងអំឡុងពេលមានការគាបសង្កត់ផ្នែកនយោបាយជាច្រើនឆ្នាំ ក៏ត្រូវតែរាប់បញ្ចូលទាំងមេដឹកនាំដែលត្រូវបានទម្លាក់ពីអំណាច គឺលោក Nicolas Maduro ផងដែរ។

គួរបញ្ជាក់ថា លោក Maduro ត្រូវបានចាប់ខ្លួនដោយកងកម្លាំងអាមេរិក អំឡុងការវាយប្រហារយោធាដ៏សាហាវមួយ កាលពីថ្ងៃទី៣ ខែមករា ហើយត្រូវបានបញ្ជូនទៅទីក្រុង New York របស់សហរដ្ឋអាមេរិក ដើម្បីប្រឈមជាមួយនឹងការកាត់ទោសពីបទចោទប្រកាន់ ពាក់ព័ន្ធនឹងគ្រឿងញៀន។

អនុប្រធានាធិបតីរបស់លោក គឺលោកស្រី Delcy Rodriguez បានឡើងកាន់តំណែងដោយមានការយល់ព្រមពីប្រធានាធិបតីអាមេរិក លោក Donald Trump ល្គឹកណាតែលោកស្រីធ្វើតាមការប៉ុនប៉ងរបស់ទីក្រុងវ៉ាស៊ីនតោន ជុំវិញលទ្ធភាពទទួលបានប្រេងរបស់វ៉េណេស៊ុយអេឡា និងពង្រីកសេរីភាពប្រជាធិបតេយ្យ។ ក្រោយមក លោកស្រីបានស្នើឲ្យមានការលើកលែងទោសដោយទូទៅ ដោយសេចក្ដីលម្អិតនៃសេចក្តីព្រាងច្បាប់មួយ ត្រូវបានដាក់ជូនទៅរដ្ឋសភា ដែលអាចត្រូវបានអនុម័តនៅថ្ងៃទី១២ ខែកុម្ភៈនេះ។

ហើយលោក Saab បានប្រាប់សារព័ត៌មាន AFP នៅថ្ងៃទី១១ ខែកុម្ភៈថា ការលើកលែងទោស គឺជាមធ្យោបាយតែមួយគត់ ដើម្បីសម្រេចបាននូវ «សន្តិភាពពិតប្រាកដ» នៃប្រទេសមួយ ដែលនៅតែរង្គោះរង្គើពីការគាបសង្កត់ជាច្រើនឆ្នាំ ដោយមានអ្នករិះគន់រដ្ឋាភិបាលរាប់រយនាក់ ត្រូវបានជាប់ពន្ធនាគារពីបទចោទប្រកាន់មិនច្បាស់លាស់ ក្នុងនោះរួមទាំង «ភេរវកម្ម» និង «អំពើក្បត់ជាតិ» ផងដែរ។

ជាមួយគ្នានេះ លោក Saab បានទទូចថា ការចាប់ខ្លួនលោក Maduro និងភរិយារបស់លោក លោកស្រី Cilia Flores គឺជាការរំលោភលើច្បាប់អន្តរជាតិ ហើយបាននិយាយថា ការលើកលែងទោស គួរតែត្រូវបានរួមបញ្ចូលអ្នកទាំង២ ផងដែរ ដើម្បីជាផ្នែកនៃ «កាយវិការមនុស្សធម៌ ប្រវត្តិសាស្ត្រ និងមិនធ្លាប់មានពីមុនមក» សម្រាប់ប្រទេសវ៉េណេស៊ុយអេឡា ក្នុងដំណើរឆ្ពោះទៅមុខ៕