សម្ព័ន្ធសហជីពពាណិជ្ជកម្មសំខាន់ៗ និងក្រុមកសិករ នៅឥណ្ឌា បានធ្វើកូដកម្មទូទាំងប្រទេស នៅថ្ងៃព្រហស្បតិ៍ (ទី១២ ខែកុម្ភៈ ឆ្នាំ២០២៦) នេះ ដើម្បីតវ៉ាប្រឆាំងនឹងកិច្ចព្រមព្រៀងពាណិជ្ជកម្មបណ្តោះអាសន្នជាមួយសហរដ្ឋអាមេរិក ដោយលើកឡើងថា កិច្ចព្រមព្រៀងនេះធ្វើឲ្យប៉ះពាល់ដល់ផលប្រយោជន៍របស់កសិករ អាជីវកម្មខ្នាតតូច និងកម្មករ។

នៅក្នុងសភា សមាជិកសភាមកពីគណបក្សនយោបាយប្រឆាំង បានទាមទារឲ្យរដ្ឋាភិបាលលុបចោលកិច្ចព្រមព្រៀងពាណិជ្ជកម្ម និងបានរិះគន់នាយករដ្ឋមន្ត្រី លោក Narendra Modi ជាមួយនឹងពាក្យស្លោកថា «ជនចុះចាញ់ Narendra Modi ជនចុះញ៉ម Modi»។

កូដកម្មរយៈពេល ១ថ្ងៃនេះ បានរំខានដល់សេវាកម្មសាធារណៈ និងសកម្មភាពផលិតកម្មដោយផ្នែក ដោយបង្ហាញពីការប្រឆាំងនឹងរបៀបវារៈកំណែទម្រង់ដាក់ដោយលោក Modi ដែលជាមេដឹកនាំគណបក្សកំពុងកាន់អំណាច Bharatiya Janata (BJP) និងបានគូសបញ្ជាក់ពីហានិភ័យនយោបាយនៃការជំរុញគោលនយោបាយផ្តោតលើទីផ្សារ នៅមុនការបោះឆ្នោតដ៏សំខាន់តាមរដ្ឋ នាចុងឆ្នាំនេះ។

មេដឹកនាំសហជីពម្នាក់ បាននិយាយថា កិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន បើកឲ្យទីផ្សារឥណ្ឌាពេញដោយផលិតផលកសិកម្មដែលទទួលបានការឧបត្ថម្ភធន ជាអ្វីដែលគំរាមកំហែងដល់ជីវភាពរស់នៅរបស់កសិកររាប់លាននាក់។

រដ្ឋាភិបាលនៅទីក្រុងញូវដេលី បានការពារកតិកាសញ្ញាពាណិជ្ជកម្មបណ្តោះអាសន្ននេះថា ជាជំហានមួយឆ្ពោះទៅរកការពង្រីកការនាំចេញ ទាក់ទាញការវិនិយោគ និងពង្រឹងទំនាក់ទំនងជាយុទ្ធសាស្ត្រជាមួយសហរដ្ឋអាមេរិក។ ហើយរដ្ឋមន្ត្រីពាណិជ្ជកម្មឥណ្ឌា លោក Piyush Goyal បាននិយាយថ្មីៗនេះថា ផលប្រយោជន៍របស់កសិករ ក្នុងវិស័យកសិកម្ម និងផលិតផលទឹកដោះគោ ត្រូវបានការពារ។

ប្រទេសឥណ្ឌា និងសហរដ្ឋអាមេរិកក្នុងខែនេះ បានប្រកាសថា ភាគីទាំង២ កំពុងខិតជិតដល់កតិកាសញ្ញាពាណិជ្ជកម្មជាផ្លូវការ ដោយចេញផ្សាយក្របខ័ណ្ឌបណ្តោះអាសន្នដែលនឹងទម្លាក់អត្រាពន្ធ និងពង្រឹងទំនាក់ទំនងសេដ្ឋកិច្ច៕