ឧស្សាហកម្មទេសចរណ៍នៅប្រទេសគុយបា បានរងផលប៉ះពាល់យ៉ាងធ្ងន់ធ្ងរ ដោយសារកង្វះខាតប្រេងឥន្ធនៈធ្ងន់ធ្ងរ ដែលធ្វើឲ្យគ្រោះថ្នាក់ដល់វិស័យសេដ្ឋកិច្ចដ៏សំខាន់នៅក្នុងប្រទេសកោះមួយនេះ ។

វិបត្តិប្រេងឥន្ធនៈ បានកើតមានឡើង បន្ទាប់ពីរដ្ឋបាលរបស់ប្រធានាធិបតីសហរដ្ឋអាមេរិកលោក Donald Trumpបានចាត់វិធានការកាលពីខែមករា ដើម្បីរារាំងការនាំចេញប្រេងទៅកាន់ប្រទេសគុយបា ។

កាលពីថ្ងៃអង្គារ ក្រុមការងារទេសចរណ៍ បានបង្ហាញក្តីបារម្ភរបស់ពួកគេចំពោះបញ្ហាកើនឡើង បណ្តាលមកពីការបិទប្រេងមួយនេះ ។

លោក Alejandro Morejon គឺជាកម្មករទេសចរណ៍មួយរូប បានចាត់ទុកស្ថានភាពបែបនេះ ថាជាការដួលរលំនៃវិស័យទេសចរណ៍ ។

លោកថា គុយបា លែងអាចប្រកួតប្រជែងជាមួយប្រទេសជិតខាងបានទៀតហើយ ដូចជាប្រទេសម៉ិកស៊ិក និងសាធារណរដ្ឋដូមីនីក ដោយសារកង្វះខាតប្រេងឥន្ធនៈ បានបង្អាក់គ្រប់វិស័យទាំងអស់ ។

ចំណែកឯលោក Jorge Fernandez គឺជាបើករថយន្តតាក់ស៊ីម្នាក់ បានអំពាវនាវឲ្យលោក Trump និងប្រធានាធិបតីគុយបានលោក Miguel Diaz-Canel ឈានដល់កិច្ចព្រមព្រៀង ។

លោកនិយាយថា ពលរដ្ឋធម្មតាគឺជាអ្នករងគ្រោះខ្លាំងបំផុតដោយសារភាពទាល់ច្រករវាងរដ្ឋាភិបាលទាំង ២ ។

សូមបញ្ជាក់ថា ការចែកចាយប្រេងចុងក្រោយដែលគេដឹង បានមកដល់ពីប្រទេសម៉ិកស៊ិកកាលពីដើមខែមករានេះ ៕