នាវាចម្បាំង ១គ្រឿង និងនាវាផ្គត់ផ្គង់ជំនួយរបស់កងទ័ពជើងទឹក ១គ្រឿងរបស់សហរដ្ឋអាមេរិក បានបុកគ្នាក្នុងអំឡុងពេលចាក់បំពេញប្រេង កាលថ្ងៃពុធ (ទី១១ ខែកុម្ភៈ ឆ្នាំ២០២៦)។ នេះបើយោងតាមការចុះផ្សាយរបស់សារព័ត៌មាន Wall Street Journal (WSJ) ដោយដកស្រង់សម្តីពីអ្នកនាំពាក្យយោធាមួយរូប។

សារព័ត៌មាន WSJ បានរាយការណ៍ថា នាវាពិឃាតប្រភេទ Arleigh Burke គឺ USS Truxtun និងនាវាប្រភេទផ្ដល់ជំនួយប្រយុទ្ធលឿនរហ័ស USNS Supply បានបុកគ្នាក្នុងអំឡុងពេលចាក់បំពេញប្រេង នៅក្នុងសមុទ្រ ដែលបណ្តាលឲ្យមនុស្ស ២នាក់ រងរបួសស្រាល។

យ៉ាងណាក្ដី ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានឡើយ។ ទីបញ្ជាការភាគខាងត្បូងសហរដ្ឋអាមេរិក ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយរបស់សារព័ត៌មាន Reuters។

បើទោះបីជាមូលហេតុនៃការបុកគ្នានេះ មិនទាន់ដឹងច្បាស់លាស់នៅឡើយក្ដី ក៏ហេតុការណ៍នេះកំពុងស្ថិតក្រោមការស៊ើបអង្កេត។ នេះបើយោងតាមការចុះផ្សាយរបស់សារព័ត៌មាន WSJ ដោយដកស្រង់សម្តីអ្នកនាំពាក្យទីបញ្ជាការភាគខាងត្បូង គឺលោកវរសេនីយ៍ឯក Emmanuel Ortiz។ 

លោក Ortiz បានបញ្ជាក់ថា នាវាទាំង ២គ្រឿង បានរាយការណ៍ថា អាចបន្តដំណើរទៅមុខដោយសុវត្ថិភាព៕