មេដឹកនាំសាសនាកេនយ៉ាលោក Paul Mackenzie និងមនុស្ស ៧នាក់ផ្សេងទៀត ដែលពាក់ព័ន្ធនឹងនិកាយថ្ងៃវិនាស ត្រូវបានតុលាការ ធ្វើការចោទប្រកាន់ថ្មីកាលពីថ្ងៃពុធ ជុំវិញករណីស្លាប់មនុស្ស ៥២នាក់ ដែលសាកសពរបស់ពួកគេ ត្រូវបានរកឃើញនៅក្នុងផ្នូររាក់ ស្ថិតនៅតំបន់ភាគឦសានប្រទេសកេនយ៉ា កាលពីឆ្នាំ ២០២៥ ។

លោក Mackenzie និងមនុស្សផ្សេងទៀត បានប្រឈមរួចទៅហើយការចោទប្រកាន់ រួមទាំងករណីឃាតកម្ម និងភេរវកម្ម ពាក់ព័ន្ធនឹងការស្លាប់របស់មនុស្សដែលសាកសពរបស់ពួកគេ ត្រូវបានរកឃើញនៅក្នុងព្រៃ Shakahola ដែលស្ថិតនៅក្នុងចំណោមគ្រោះមហន្តរាយស្លាប់មនុស្សពាក់ព័ន្ធនឹងនិកាយសាសនាធំបំផុតរបស់ពិភពលោក នៅក្នុងប្រវត្តិសាស្រ្តសម័យទំនើប ។

ក្រុមរដ្ឋអាជ្ញានិយាយថា លោក Mackenzie និងព្រះវិហារអន្តរជាតិដំណឹងថ្មីរបស់លោក បានរៀបចំពិធីសាសនា ដែលពួកគេបញ្ជាឲ្យបរិវារបង្អត់ខ្លួនឯង និងកូនៗរបស់ពួកគេរហូតដល់ស្លាប់ ដើម្បីបានឡើងទៅលើឋានសួគ៌ មុនពេលពិភពលោកត្រូវបញ្ចប់ ។ លោក Mackenzie បានច្រានចោលរាល់ការចោទប្រកាន់ទាំងអស់ ។

នៅឆ្នាំ ២០២៥ រយៈពេល ២ឆ្នាំ ក្រោយការស៊ើបអង្កេតចាប់ផ្តើម ក្រុមរដ្ឋអាជ្ញា និយាយថា សាកសពមនុស្សជាង ៤០០នាក់ ត្រូវបានរកឃើញនៅក្នុងព្រៃ Shakaholaដែលស្ថិតក្នុងស្រុក Kilifi នៅតំបន់ឆ្នេរភាគខាងកើតប្រទេសកេនយ៉ា ។

ក្រុមស៊ើបអង្កេតផ្តោតសំខាន់លើទីតាំងផ្នូរសង្ស័យ ហើយនៅខែសីហា ឆ្នាំ ២០២៥ សាកសពមនុស្ស ៥២នាក់ ត្រូវបានរកឃើញពីផ្នូររាក់ នៅក្នុង និងជុំវិញតំបន់ Kwa Binzaro ដែលស្ថិតនៅចម្ងាយប្រហែល ៣០គ.ម ពីព្រៃ Shakahola ៕