ក្រុមមន្ត្រីបាននិយាយថា កងកម្លាំងរុស្ស៊ី បានវាយសន្ធាប់លើអ៊ុយក្រែន ដោយប្រើយានដ្រូនរាប់រយគ្រឿង និងមីស៊ីលបាលីស្ទិកជាង ២០គ្រប់ កាលពីយប់ថ្ងៃព្រហស្បតិ៍ (១២ កុម្ភៈ) ដោយបានបំផ្លាញប្រព័ន្ធថាមពលដ៏លំបាកសម្រាប់ទៅហើយរបស់អ៊ុយក្រែន ឱ្យកាន់តែធ្ងន់ធ្ងរថែមទៀត និងធ្វើឱ្យមនុស្សរាប់ម៉ឺននាក់ក្នុងរដ្ឋធានីគីវ និងទីក្រុងមួយចំនួន ពុំមានថាមពលកម្ដៅ ចរន្តអគ្គិសនី និងទឹកប្រើប្រាស់។

រុស្ស៊ី បានបង្កើនយុទ្ធនាការវាយប្រហារតាមច្រកអាកាសក្នុងរដូវរងារបស់ខ្លួន ដាក់គោលដៅលើបណ្តាញអគ្គិសនីរបស់អ៊ុយក្រែន ដោយធ្វើឱ្យទីក្រុងធំៗធ្លាក់ចូលទៅក្នុងភាពត្រជាក់និងភាពងងឹតរយៈពេលយូរ ក្រោមសីតុណ្ហភាពត្រជាក់ដ៏កំណាច។

ក្នុងទីក្រុងគីវតែមួយប៉ុណ្ណោះ អគារលំនៅឋានប្រហែល ៣.៥០០ខ្នង ពុំមានប្រព័ន្ធកម្ដៅប្រើប្រាស់នោះទេកាលពីថ្ងៃព្រហស្បតិ៍ បន្ទាប់ពីការវាយប្រហារទ្រង់ទ្រាយធំចុងក្រោយបំផុតនេះ បានកាត់ផ្ដាច់ការផ្គត់ផ្គង់ដល់អគារខ្ពស់ៗរាប់ពាន់ខ្នង ដែលបានរងផលប៉ះពាល់រួចទៅហើយក្នុងការវាយប្រហារលើកមុន នេះបើយោងតាមការលើកឡើងរបស់លោកអភិបាលក្រុងគីវ Vitali Klitschko។ កំពង់ផែសមុទ្រខ្មៅរបស់ក្រុងអូដេសា ត្រូវបានវាយប្រហារដល់ទៅ ២លើក ក្នុងពេលតិចជាង ២៤ម៉ោង។

ក្រុមហ៊ុនថាមពលឯកជន DTEK បាននិយាយថា រោងចក្រថាមពលកម្ដៅមួយរបស់ខ្លួនត្រូវបានកំណត់គោលដៅ ហើយក្រុមគ្រួសារជាង ១សែនគ្រួសារ មិនមានអគ្គិសនីប្រើប្រាស់។ កងទ័ពអាកាសអ៊ុយក្រែនបាននិយាយថា រុស្ស៊ីបាញ់មីស៊ីលបាលីស្ទិកចំនួន ២៤គ្រាប់ មីស៊ីលតម្រង់គោលដៅ ១គ្រាប់ និងយានដ្រូនចំនួន ២១៩គ្រឿង ពេញមួយយប់ថ្ងៃព្រហស្បតិ៍ ហើយប្រព័ន្ធការពារដែនអាកាសរបស់អ៊ុយក្រែន បានបាញ់ទម្លាក់ ឬបន្សាបមីស៊ីលចំនួន ១៦គ្រាប់ និងយានដ្រូនចំនួន ១៩៧គ្រឿង៕