លោក Tom Homan មន្ត្រីជាន់ខ្ពស់ផ្នែកព្រំដែនរបស់សេតវិមាន បាននិយាយកាលពីថ្ងៃព្រហស្បតិ៍ (១២ កុម្ភៈ) ថា ប្រធានាធិបតីអាមេរិក លោក Donald Trump បានយល់ព្រមបញ្ចប់កំណើននៃយុទ្ធនាការនិរទេសដែលមិនធ្លាប់មានពីមុនមកនិងចម្រូងចម្រាសខ្លាំងរបស់លោក លើជនអន្តោប្រេវសន៍នៅរដ្ឋ Minnesota ដោយភ្នាក់ងារអនុវត្តច្បាប់អន្តោប្រវេសន៍ជាច្រើននាក់ នឹងវិលត្រឡប់ទៅរដ្ឋប្រចាំការរបស់ពួកគេវិញ ក្នុងរយៈពេល ១សប្តាហ៍បន្ទាប់។

ក្រោមប្រតិបត្តិការដែលដាក់ឈ្មោះថា «Metro Surge» លោក Trump បានដាក់ពង្រាយភ្នាក់ងារអន្តោប្រវេសន៍ប្រដាប់ដោយអាវុធប្រហែល ៣ពាន់នាក់ នៅចុងខែមករា ដើម្បីនិរទេសជនអន្តោប្រវេសន៍នៅរដ្ឋ Minnesota។ លោកបានហៅប្រតិបត្តិការនេះថាជា «ប្រតិបត្តិការនិរទេសដ៏ធំបំផុតក្នុងប្រវត្តិសាស្ត្រសហរដ្ឋអាមេរិក» ប៉ុន្តែមានការជំទាស់និងការរិះគន់ខ្លាំងពីអភិបាលរដ្ឋ លោក Tim Walz ក៏ដូចជាការមិនពេញចិត្តពីប្រជាជនក្នុងតំបន់ ដែលបាននាំគ្នាចេញតវ៉ាតាមដងផ្លូវនៃទីក្រុងធំៗមួយចំនួនរបស់រដ្ឋ។

កាលពីខែមករាកន្លងទៅ ភ្នាក់ងារអន្តោប្រវេសន៍បានបាញ់សម្លាប់ពលរដ្ឋអាមេរិកពីរនាក់ ក្នុងហេតុការណ៍ដាច់ដោយឡែកពីគ្នា នៅទីក្រុង Minneapolis ហើយជម្លោះរបស់លោក Trump ជាមួយរដ្ឋ Minnesota បានផ្ទុះឡើងទៅជាវិបត្តិនយោបាយដ៏តានតឹងបំផុតមួយដែលលោកបានជួបប្រទះ ក្នុងអាណត្តិប្រធានាធិបតីរបស់លោក។

លោក Homan បានប្រាប់អ្នកយកព័ត៌មាននៅក្នុងសន្និសីទសារព័ត៌មានមួយនៅការិយាល័យសហព័ន្ធខាងក្រៅទីក្រុង Minneapolis ថា៖ «លោកបានស្នើឡើង ហើយលោកប្រធានាធិបតី Trump បានយល់ស្របថា ប្រតិបត្តិការបង្ក្រាបនេះនឹងត្រូវបញ្ចប់ ដូច្នេះប្រតិបត្តិការ Metro Surge កំពុងបញ្ចប់ហើយ»។ កាលពីមួយសប្តាហ៍មុន លោក Homan បានប្រកាសថា ភ្នាក់ងារអន្តោប្រវេសន៍ប្រហែល ៧០០នាក់ ក្នុងចំណោម ៣.០០០នាក់ដែលបានដាក់ពង្រាយនៅទីនោះ នឹងត្រូវដកចេញ៕