សហរដ្ឋអាមេរិកបានបញ្ជាក់កាលពីថ្ងៃព្រហស្បតិ៍១២កុម្ភៈសប្ដាហ៍នេះថា ខ្លួនបានដកកងកម្លាំងរបស់ខ្លួនចេញពីមូលដ្ឋានយោធា Al-Tanf ហើយ ខណៈក្រសួងការពារជាតិស៊ីរីបាននិយាយកាលពីថ្ងៃព្រហស្បតិ៍ដដែលនោះ ថាកងទ័ពខ្លួនបានចូលគ្រប់គ្រងមូលដ្ឋានយោធានេះ បន្ទាប់ពីការដកទ័ពអាមេរិកដែលដាក់ពង្រាយនៅទីនោះជាផ្នែកមួយនៃក្រុមចម្រុះប្រឆាំងនឹងក្រុមរដ្ឋអ៊ីស្លាម ។

ទីបញ្ជាការកណ្ដាលអាមេរិក ដែលទទួលខុសត្រូវសម្រាប់កងកម្លាំងអាមេរិកក្នុងតំបន់មជ្ឈិមបូព៌ាបាននិយាយក្នុងសេចក្ដីថ្លែងការណ៍ថា ការដកទ័ពអាមេរិកតាមបញ្ជាចេញពីមូលដ្ឋានយោធានេះបានបញ្ចប់កាលពីមួយថ្ងៃមុន។

សេចក្តីថ្លែងការណ៍របស់ក្រសួងការពារជាតិបាននិយាយថា តាមរយៈការសម្របសម្រួលរវាងភាគីស៊ីរី និងអាមេរិក អង្គភាពកងទ័ពបានគ្រប់គ្រងមូលដ្ឋាននេះ ហើយបានចាប់ផ្តើមដាក់ពង្រាយទ័ពតាមបណ្តោយព្រំដែនស៊ីរី-អ៊ីរ៉ាក់-ហ្ស៊កដានីនៅក្បែរនោះ។

ប្រភពយោធាស៊ីរីចំនួនពីរបានប្រាប់សារព័ត៌មាន AFP កាលពីថ្ងៃពុធ ១១កុម្ភៈថា កងកម្លាំងអាមេរិកបានដកទ័ពចេញពីមូលដ្ឋាននោះ ទៅកាន់ប្រទេសហ្ស៊កដានី ហើយ។

ម្នាក់ក្នុងចំណោមពួកគេបាននិយាយថា កងកម្លាំងអាមេរិកបានដកគ្រឿងយុទ្ធោបករណ៍ចេញអស់រយៈពេល១៥ ថ្ងៃកន្លងមកហើយ។

ក្នុងអំឡុងពេលសង្គ្រាមស៊ីវិលស៊ីរី និងការប្រយុទ្ធប្រឆាំងនឹងក្រុមរដ្ឋអ៊ីស្លាម (IS) កងកម្លាំងអាមេរិកត្រូវបានដាក់ពង្រាយនៅភាគឦសានដែលគ្រប់គ្រងដោយក្រុមជនជាតិភាគតិចឃឺដរបស់ប្រទេសនេះ និងនៅមូលដ្ឋានយោធា Al-Tanf ជិតព្រំដែនជាមួយហ្ស៊កដានី និងអ៊ីរ៉ាក់។

កងកម្លាំងប្រជាធិបតេយ្យស៊ីរី (SDF) ដឹកនាំដោយក្រុមឃឺដ បានក្លាយជាដៃគូដ៏សំខាន់របស់ក្រុមចម្រុះប្រឆាំងនឹងរដ្ឋអ៊ីស្លាម និងជាផ្នែកសំខាន់ក្នុងការកម្ចាត់ចោលដែនដីរបស់ក្រុមនេះនៅប្រទេសស៊ីរីក្នុងឆ្នាំ ២០១៩៕