ប្រធានាធិបតីសហរដ្ឋអាមេរិក លោក Donald Trump បានបង្កើនសម្ពាធរបស់លោកទៅលើប្រធានាធិបតីអ៊ីស្រាអែល លោក Isaac Herzog ខណៈលោកស្វែងរកការលើកលែងទោសសម្រាប់សម្ព័ន្ធមិត្តរបស់លោក គឺនាយករដ្ឋមន្ត្រី លោក Benjamin Netanyahu ដែលកំពុងប្រឈមនឹងការចោទប្រកាន់ពីបទសូកប៉ាន់។ ប្រធានាធិបតីសហរដ្ឋអាមេរិក បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា នាយករដ្ឋមន្ត្រីអ៊ីស្រាអែលគឺជាមេដឹកនាំសម័យសង្គ្រាម «មិនធម្មតានោះទេ»។ ក្រោយមកលោកបានរិះគន់លោក Herzog ចំពោះការខកខានមិនបានផ្តល់ការលើកលែងទោសដល់លោក Netanyahu។

លោក Trump បាននិយាយអំពីលោក Herzog ថា «អ្នកមានប្រធានាធិបតី ដែលបដិសេធមិនផ្តល់ការលើកលែងទោស។ ខ្ញុំគិតថាបុរសនោះ គួរតែខ្មាស់អៀនចំពោះខ្លួនឯង»។ ប្រជាជនអ៊ីស្រាអែលគួរតែដាក់សម្ពាធលើលោក Herzog ឱ្យផ្តល់ការលើកលែងទោសដល់លោក Netanyahu។

ការលើកឡើងទាំងនេះ ធ្វើឡើងមួយថ្ងៃបន្ទាប់ពីលោក Trump បានធ្វើជាម្ចាស់ផ្ទះទទួលលោក Netanyahu នៅសេតវិមាន ជាជំនួបលើកទីប្រាំពីររបស់មេដឹកនាំទាំងពីរចាប់តាំងពីប្រធានាធិបតីសហរដ្ឋអាមេរិករូបនេះ បានវិលត្រឡប់ទៅកាន់អំណាចវិញកាលពីឆ្នាំមុន។ លោក Netanyahu ត្រូវបានចោទប្រកាន់ពីបទទទួលអំណោយជាសំណូក និងកំពុងពិចារណាលើកិច្ចព្រមព្រៀងជាមួយប្រព័ន្ធផ្សព្វផ្សាយជាថ្នូរនឹងការផ្សាយព័ត៌មានដែលពេញចិត្តអំពីរដ្ឋាភិបាលរបស់លោក។

ការជម្រះក្តីលើកដំបូងរបស់លោកបានចាប់ផ្តើមនៅឆ្នាំ ២០២០ ប៉ុន្តែដំណើរការផ្លូវច្បាប់ត្រូវបានរំខានដដែលៗដោយភាពវឹកវរខាងភូមិសាស្ត្រនយោបាយនៅក្នុងតំបន់ រួមទាំងសង្គ្រាមប្រល័យពូជសាសន៍របស់អ៊ីស្រាអែលនៅតំបន់ហ្កាហ្សា។