រដ្ឋមន្ត្រីការបរទេសទួរគីបានព្រមានថា ការពង្រីកកិច្ចពិភាក្សានុយក្លេអ៊ែរជាមួយអ៊ីរ៉ង់ ដើម្បីរួមបញ្ចូលកម្មវិធីមីស៊ីលផ្លោងរបស់ខ្លួន និងសកម្មភាពក្នុងតំបន់ នឹងប្រឈមហានិភ័យនៃការបង្កសង្គ្រាមមួយផ្សេងទៀត ទោះបីជាទីក្រុងវ៉ាស៊ីនតោនបន្តជំរុញឱ្យមានកិច្ចព្រមព្រៀងកាន់តែទូលំទូលាយក៏ដោយ។

លោក Hakan Fidan បានប្រាប់សារព័ត៌មាន Financial Times ដោយសំដៅទៅលើឃ្លាំងអាវុធមីស៊ីលរបស់អ៊ីរ៉ង់ និងការគាំទ្រដល់ក្រុមសកម្មប្រយុទ្ធថា ប្រសិនបើសហរដ្ឋអាមេរិកទទូចឱ្យដោះស្រាយបញ្ហាទាំងអស់ក្នុងពេលតែមួយ រូបលោកខ្លាចថាសូម្បីតែឯកសារនុយក្លេអ៊ែរក៏មិនដំណើរការទៅមុខដែរ ហើយលទ្ធផលអាចជាសង្គ្រាមមួយផ្សេងទៀតនៅក្នុងតំបន់។

ការអត្ថាធិប្បាយរបស់លោក Fidan បានកើតឡើងខណៈសហរដ្ឋអាមេរិកអះអាងថា កិច្ចព្រមព្រៀងណាមួយជាមួយទីក្រុងតេអេរ៉ង់ ត្រូវតែលើសពីការចម្រាញ់អ៊ុយរ៉ានីញ៉ូម ដើម្បីរួមបញ្ចូលដែនកំណត់លើមីស៊ីលផ្លោង និងបញ្ចប់ការគាំទ្រដល់ក្រុមប្រដាប់អាវុធនៅទូទាំងមជ្ឈិមបូព៌ា។  

ប្រធានាធិបតី Donald Trump បាននិយាយម្តងទៀតអំពីជំហរនោះ បន្ទាប់ពីបានទទួលលោកនាយករដ្ឋមន្ត្រីអ៊ីស្រាអែល Benjamin Netanyahu នៅឯសេតវិមានកាលពីថ្ងៃពុធសប្ដាហ៍នេះជាទីដែលមេដឹកនាំទាំងពីរបានពិភាក្សាអំពីអ៊ីរ៉ង់ និងបានឯកភាពគ្នាថា វិសាលភាពនៃកិច្ចព្រមព្រៀងណាមួយគឺជាបញ្ហាសំខាន់។

ផ្ទុយទៅវិញ ក្រុមមន្ត្រីអ៊ីរ៉ង់បាននិយាយម្តងហើយម្តងទៀតអំពីការចរចាគួរតែផ្តោតតែលើឯកសារនុយក្លេអ៊ែរប៉ុណ្ណោះ។ ទីក្រុងតេអេរ៉ង់បានបដិសេធការពិភាក្សាណាមួយអំពីកម្មវិធីមីស៊ីលរបស់ខ្លួន ដែលខ្លួនពិពណ៌នាថាមិនអាចចរចាបាន ហើយបានការពារសម្ព័ន្ធភាពក្នុងតំបន់របស់ខ្លួន៕