លោក Daryl Kimball នាយកប្រតិបត្តិនៃសមាគមត្រួតពិនិត្យអាវុធអាមេរិក បាននិយាយនៅក្នុងបទសម្ភាសន៍ជាមួយមជ្ឈមណ្ឌលវិភាគរបស់សារព័ត៌មានTASSថា ការផុតកំណត់នៃសន្ធិសញ្ញាកាត់បន្ថយអាវុធយុទ្ធសាស្ត្រថ្មី (New START) មិនបង្កឲ្យមានប្រតិកម្មជាបន្តបន្ទាប់ ដែលនឹងជុំរុញឲ្យមាន ការប្រណាំងប្រជែងសព្វាវុធសកលនោះទេ។

អ្នកជំនាញរូបនេះ បាននិយាយថា៖«ការប្រណាំងប្រជែងសព្វាវុធទំនើបៗ គឺមិនមែនជារឿងជៀសមិនរួចនោះទេ។ ទោះជាយ៉ាងណាក៏ដោយ បើគ្មានការកំណត់របស់សន្ធិសញ្ញា New START ឬការយោគយល់គ្នាទ្វេភាគី ដើម្បីបន្តគោរពការកំណត់ទាំងនោះទេ ការបង្កើតអាវុធនុយក្លេអ៊ែរយុទ្ធសាស្ត្រដែលដាក់ពង្រាយដោយសហរដ្ឋអាមេរិក និងរុស្ស៊ី គឺអាចធ្វើទៅបាន ហើយប្រសិនបើវាចាប់ផ្តើម នោះយើងកំពុងសម្លឹងមើលរយៈពេលនៃការប្រណាំងប្រជែងសព្វាវុធបីភាគី (ដែលពាក់ព័ន្ធនឹងសហរដ្ឋអាមេរិក រុស្ស៊ី និងចិន) ហើយថាតើរឿងនេះ កើតឡើងឬអត់នោះ នឹងអាស្រ័យលើអ្វីដែលមេដឹកនាំនៃប្រទេសទាំងបីនេះ ធ្វើ ឬមិនធ្វើ ក្នុងរយៈពេលប៉ុន្មានខែខាងមុខនេះ»។

លោក Kimball បានទទួលស្គាល់ថា ទោះបីជាមានលទ្ធផលវិជ្ជមាននៃកិច្ចប្រជុំកំពូលនៅទីក្រុង Anchorage រដ្ឋអាឡាស្កា ក៏ដោយ ការចរចាពិតប្រាកដអំពីស្ថិរភាពយុទ្ធសាស្ត្រ មិនទាន់ត្រូវបានធ្វើឡើងរវាងរដ្ឋបាលរបស់ប្រធានាធិបតីអាមេរិក ដូណាល់ ត្រាំ និងអាជ្ញាធររុស្ស៊ីបច្ចុប្បន្ននៅឡើយទេ។

អ្នកជំនាញរូបនេះបានកត់សម្គាល់ថា៖«ប្រភពរបស់ខ្ញុំបង្ហាញថា មិនមានការចរចាពិតប្រាកដណាមួយ ចាប់តាំងពីកិច្ចប្រជុំកំពូលនៅរដ្ឋអាឡាស្កាមក ហើយនៅតែមិនមានសំណើរបស់សហរដ្ឋអាមេរិក (ឬសំណើរបស់រុស្ស៊ីណាមួយ) ដើម្បីធ្វើដូច្នេះទេ ទោះបីជាលោក ត្រាំ បានបញ្ជាក់អំពីបំណងប្រាថ្នារបស់លោកសម្រាប់ «កិច្ចព្រមព្រៀងដ៏ល្អប្រសើរមួយ» ដែលក៏ពាក់ព័ន្ធនឹងប្រទេសចិនផងដែរ»៕