ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាននិយាយថា ការសន្ទនាដែលអាចធ្វើទៅបានជាមួយមេដឹកនាំរុស្ស៊ី លោក វ្ល៉ាឌីមៀ ពូទីន (Vladimir Putin) មិនត្រូវបានគ្រោងទុកក្នុងរយៈពេលប៉ុន្មានថ្ងៃខាងមុខនេះទេ។ នេះបើយោងតាមការអត្ថាធិប្បាយរបស់លោក ដែលបានធ្វើឡើងបន្ទាប់ពីកិច្ចប្រជុំកំពូលក្រៅផ្លូវការមួយរបស់សហភាពអឺរ៉ុប ( EU ) នៅប្រទេសបែលហ្ស៊ិក។

លោក ម៉ាក្រុង បាននិយាយថា៖«នេះមិនមែនជាបញ្ហាសម្រាប់រយៈពេលប៉ុន្មានថ្ងៃខាងមុខនេះទេ»។

លោកបានបន្ថែមថា ទីប្រឹក្សាការទូតរបស់លោកបានទៅទស្សនកិច្ចប្រទេសរុស្ស៊ីរួចហើយ។ មេដឹកនាំបារាំងរូបនេះ បាននិយាយថា៖«យើងកំពុងរៀបចំផែនការ»។ នេះបើយោងតាមវីដេអូនៃសុន្ទរកថារបស់លោកដែលបានបង្ហោះនៅលើទំព័រនៃប្រព័ន្ធផ្សព្វផ្សាយ X របស់វិមាន Elysee។

នៅពេលសួរថាតើលោកមានបំណងអញ្ជើញតំណាងរុស្ស៊ីឲ្យចូលរួមកិច្ចប្រជុំ G7 ណាមួយ នៅប្រទេសបារាំងដែរឬទេ លោក ម៉ាក្រុង បាននិយាយថា៖«នេះគឺមិនមែនជារបៀបវារៈទេ» លុះត្រាតែជម្លោះនៅអ៊ុយក្រែនត្រូវបានបញ្ចប់។ លោកប្រធានាធិបតី បាននិយាយថា៖«ប៉ុន្តែខ្ញុំមិនមានអារម្មណ៍ថា រឿងនេះនឹងកើតឡើងឆាប់ៗនេះទេ»។

នាពេលមុននេះ លោក ម៉ាក្រុង បានលើកឡើងនៅក្នុងបទសម្ភាសន៍ជាមួយសារព័ត៌មានអាល្លឺម៉ង់ Suddeutsche Zeitung ថា លោកបានស្នើនៅក្នុងការសន្ទនាជាមួយសហសេវិកអឺរ៉ុបជាច្រើនថា ការសន្ទនាជាមួយរុស្ស៊ី គួរតែត្រូវបានបន្តឡើងវិញ។ តាមទស្សនៈរបស់លោក ក្របខ័ណ្ឌបច្ចុប្បន្នសម្រាប់ការចរចាអំពីអ៊ុយក្រែន ដែលតំណាងសហរដ្ឋអាមេរិកពិភាក្សាអំពីលក្ខខណ្ឌដោះស្រាយជាមួយទីក្រុងមូស្គូ ដោយគ្មានការចូលរួមពីអឺរ៉ុប» មិនមែនជាការល្អប្រសើរបំផុតទេ»។ 

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយនៅថ្ងៃទី ១២ ខែកុម្ភៈថា បំណងប្រាថ្នាដែលបានបញ្ជាក់របស់លោក ម៉ាក្រុង ក្នុងការសន្ទនាតាមទូរស័ព្ទជាមួយលោក ពូទីន គឺមិនគ្រប់គ្រាន់ឬមិនគួរឲ្យទុកចិត្តបានទេ៕