អាជ្ញាធរបាននិយាយកាលពីថ្ងៃព្រហស្បតិ៍ (១២ កុម្ភៈ) ថា ព្យុះស៊ីក្លូន Gezani បានសម្លាប់មនុស្សយ៉ាងហោចណាស់ ៣៦នាក់ បង្ករបួសជាង ៣៧០នាក់ និងបំផ្លាញផ្ទះសម្បែងជិត ១៨.០០០ខ្នង នៅទូទាំងប្រទេសម៉ាដាហ្គាស្ការ ខណៈប្រធានាធិបតីនៃប្រទេសនេះ បានប្រកាសពីគ្រោះមហន្តរាយជាតិ និងបានស្នើមេដឹកនាំអន្តរជាតិ ឱ្យជួយដល់ប្រទេសកោះដ៏ក្រីក្របំផុតនៅមហាសមុទ្រឥណ្ឌានេះផង។

ព្យុះស៊ីក្លូនត្រូពិចមួយនេះ បានបោកបក់ដល់ដីគោកនៅយប់ថ្ងៃអង្គារកន្លងទៅ ហើយបានបង្កការបំផ្លិចបំផ្លាញយ៉ាងទូលំទូលាយក្នុងទីក្រុងកំពង់ផែសំខាន់ Toamasina នៅឆ្នេរសមុទ្រភាគខាងកើត មុនពេលបោកបក់ឆ្លងកាត់ទូទាំងប្រទេស។ ការិយាល័យជាតិសម្រាប់ការគ្រប់គ្រងហានិភ័យ និងគ្រោះមហន្តរាយ បាននិយាយកាលពីថ្ងៃព្រហស្បតិ៍ថា ចំនួនអ្នកស្លាប់អាចបន្តកើនឡើង ដោយសារនៅមានមនុស្សមួយចំនួនទៀតកំពុងបាត់ខ្លួន ខណៈមនុស្សជាង ២៥ម៉ឺននាក់ បានរងផលប៉ះពាល់ដោយព្យុះនេះ។

អាជ្ញាធរបាននិយាយថា អ្នកស្លាប់ភាគច្រើនបានកើតឡើងនៅក្នុងតំបន់ Toamasina ដែលជាកំពង់ផែដ៏សំខាន់របស់ប្រទេស និងជាមជ្ឈមណ្ឌលសេដ្ឋកិច្ច។ លោកប្រធានាធិបតី Michael Randrianirina បាននិយាយថា អត្រា ៧៥% នៃទីក្រុងនោះ ត្រូវបានខូចខាត ឬបំផ្លាញ។

ប្រជាជនជាច្រើនក្នុងចំណោមប្រជាជនសរុប ៣១ លាននាក់របស់ម៉ាដាហ្គាស្ការ រស់នៅក្នុងផ្ទះសម្បែងចាស់ទ្រុឌទ្រោមដែលមិនអាចទប់ទល់ពីព្យុះខ្លាំងៗបានគ្រប់គ្រាន់ទេ ហើយអាជ្ញាធរនិយាយថា ការស្លាប់ជាច្រើនគឺបណ្តាលមកពីការដួលរលំនៃអគារដ៏ចំណាស់ៗបែបនោះ៕