កូរ៉េខាងជើង បាននិយាយថា ខ្លួននឹងកោះប្រជុំសមាជបក្សលើកទី៩ នៅខែកុម្ភៈនេះ ដែលជាកិច្ចការនយោបាយដ៏សំខាន់មួយ មានគោលបំណងបង្ហាញពីការក្ដោបក្តាប់អំណាចរបស់មេដឹកនាំ គីម ជុងអ៊ុន និងបង្អួតពីរូបភាពរបស់លោកជាមេដឹកនាំដ៏សប្បុរសនៅក្នុងស្រុក និងជាប្រមុខយោធាដ៏មានឥទ្ធិពលលំដាប់ពិភពលោក។

នៅមុនកិច្ចប្រជុំដ៏សំខាន់ដែលធ្វើឡើងរៀងរាល់ ៥ឆ្នាំម្តងនេះ លោក គីម បានទស្សនកិច្ចមូលដ្ឋានយោធា និងទីតាំងសេដ្ឋកិច្ចនានាទូទាំងប្រទេស ចាប់ពីកន្លែងបាញ់មីស៊ីលបណ្ដោះអាសន្ន រហូតដល់កសិដ្ឋានផ្ទះកញ្ចក់ដ៏ធំ ដើម្បីបង្ហាញពីសមិទ្ធផលរបស់លោក។ សភាកូរ៉េខាងជើង ត្រូវបានរំពឹងថា នឹងបើកកិច្ចប្រជុំសមាជ នៅចុងខែកុម្ភៈនេះ ប៉ុន្តែពុំទាន់មានកាលបរិច្ឆេទជាក់លាក់ទេ។ សភានឹងគូសបញ្ជាក់ពីការជំរុញការអភិវឌ្ឍពេល ៥ឆ្នាំនាពេលបច្ចុប្បន្ន និងគូសបញ្ជាក់ពីអាទិភាពនាពេលអនាគត។

នៅក្នុងសមាជលើកចុងក្រោយបង្អស់នៅឆ្នាំ២០២១ លោក គីម បាននិយាយថា ផែនការសេដ្ឋកិច្ចពីមុន បានបរាជ័យក្នុង «ស្ទើរតែគ្រប់វិស័យ» ហើយបានអំពាវនាវឱ្យមានការវិនិយោគកាន់តែច្រើនលើឧស្សាហកម្មធុនធ្ងន់ ខណៈដែលពង្រឹងវិស័យកសិកម្ម និងឧស្សាហកម្មធុនស្រាល ដើម្បីបង្កើនការផ្គត់ផ្គង់ទំនិញប្រើប្រាស់។ កូរ៉េខាងជើងត្រូវបានរំពឹងថា នឹងរៀបចំក្បួនព្យុហយាត្រាយោធាដ៏សំខាន់មួយ ដើម្បីអបអរសាទរសមាជ និងបង្ហាញពីការពង្រីកសមត្ថភាពអាវុធនុយក្លេអ៊ែរ និងអាវុធធម្មតារបស់ខ្លួន។

ក្រុមអ្នកវិភាគនិយាយថា លោក គីម នឹងប្តេជ្ញាបង្ហាញពិភពលោក ជាពិសេសអាមេរិក ឱ្យឃើញថា លោកពុំមានហានិភ័យក្នុងការមានជោគវាសនាដូចអតីតមេដឹកនាំវ៉េណេស៊ុយអេឡានោះទេ បន្ទាប់ពីលោកប្រធានាធិបតីអាមេរិក ដូណាល់ ត្រាំ បានបញ្ជាឱ្យកងកម្លាំងពិសេសចូលចាប់ខ្លួនលោក នីកូឡាស ម៉ាឌូរ៉ូ ដល់រដ្ឋធានីការ៉ាកាស ក្នុងការវាយឆ្មក់ដ៏គួរឱ្យភ្ញាក់ផ្អើលមួយកាលពីខែមុន៕