សភាព័រទុយហ្គាល់ កាលពីថ្ងៃព្រហស្បតិ៍ (១២ កុម្ភៈ) បានអនុម័តសេចក្តីព្រាងច្បាប់មួយក្នុងសម័យប្រជុំលើកដំបូងរបស់ខ្លួន ទាក់ទងនឹងការដាក់កំហិតលើការប្រើប្រាស់បណ្ដាញសង្គម ដែលទាមទារឱ្យមានការយល់ព្រមច្បាស់លាស់ពីអាណាព្យាបាល សម្រាប់កុមារអាយុពី ១៣ ដល់ ១៦ឆ្នាំ ដើម្បីចូលប្រើបណ្ដាញសង្គម ដែលជាជំហាននីតិបញ្ញត្តិដ៏ជាក់ស្តែងដំបូងគេមួយនៅអឺរ៉ុបនៃការរឹតបន្តឹងបែបនេះ។

សមាជិកសភាមកពីគណបក្សកំពុងកាន់អំណាច សង្គមប្រជាធិបតេយ្យ (PSD) ដែលជាអ្នកចងក្រងសេចក្តីព្រាងច្បាប់នេះ បាននិយាយថា ជារឿងចាំបាច់ណាស់ដើម្បីការពារកុមារពីការបន្តុះបង្អាប់ ឬគំរាមធ្វើបាបតាមប្រព័ន្ធអ៊ីនធឺណិត ទប់ស្កាត់ខ្លឹមសារដែលបង្កគ្រោះថ្នាក់ និងបុគ្គលដែលកេងប្រវ័ញ្ចលើកុមារ។

ប្រព័ន្ធសាធារណៈមួយដែលគេស្គាល់ថាជា មុខងារចល័តឌីជីថល (DMK) នឹងត្រូវបានប្រើប្រាស់ដោយឪពុកម្តាយដើម្បីផ្តល់ការអនុញ្ញាតបែបនេះ ដែលក៏នឹងជួយអនុវត្តការហាមឃាត់ដែលមានស្រាប់សម្រាប់កុមារអាយុក្រោម ១៣ឆ្នាំ មិនឱ្យចូលប្រើប្រព័ន្ធផ្សព្វផ្សាយសង្គមឌីជីថល វេទិកាចែករំលែកវីដេអូនិងរូបភាព ឬគេហទំព័រចាក់ភ្នាល់តាមអ៊ីនធឺណិត។ 

សេចក្តីព្រាងច្បាប់នេះ ដែលត្រូវបានអនុម័តដោយសំឡេងគាំទ្រ ១៤៨ ទល់នឹង ៦៩ សំឡេង នៅតែអាចត្រូវបានកែប្រែ មុនពេលការបោះឆ្នោតចុងក្រោយ។ ចំណាត់ការរបស់ព័រទុយហ្គាល់ បានកើតឡើងបន្ទាប់ពីសភាជាន់ទាបរបស់ប្រទេសបារាំង បានគាំទ្រច្បាប់ហាមឃាត់កុមារអាយុក្រោម ១៥ឆ្នាំ មិនឱ្យប្រើបណ្ដាញសង្គម កាលពីខែមុន ស្របពេលក្ដីបារម្ភកាន់តែខ្លាំងឡើងអំពីការបន្តុះបង្អាប់តាមអ៊ីនធឺណិត និងហានិភ័យសុខភាពផ្លូវចិត្ត។ អូស្ត្រាលី ជាប្រទេសដំបូងគេលើពិភពលោក ដែលចេញច្បាប់ហាមឃាត់ចំពោះអ្នកដែលមានអាយុក្រោម ១៦ឆ្នាំ មិនឱ្យប្រើវេទិកាប្រព័ន្ធផ្សព្វផ្សាយសង្គម ហើយច្បាប់នោះបានចូលជាធរមាននៅក្នុងខែធ្នូ កាលពីឆ្នាំ២០២៥កន្លងទៅ៕