រដ្ឋបាលរបស់លោកប្រធានាធិបតី Donald Trump បានផ្អាកវិធានការសន្តិសុខបច្ចេកវិទ្យាសំខាន់ៗមួយចំនួន ដែលមានគោលបំណងដាក់លើទីក្រុងប៉េកាំង មុនកិច្ចប្រជុំខែមេសា រវាងមេដឹកនាំនៃប្រទេសទាំង២។ ហើយប្រភពនានាបានប្រាប់ឲ្យដឹងថា វិធានការទាំងនោះ រួមមានបម្រាមលើប្រតិបត្តិការរបស់ក្រុមហ៊ុន China Telecom នៅសហរដ្ឋអាមេរិក និងការរឹតបន្តឹងលើការលក់ឧបករណ៍ចិន សម្រាប់មជ្ឈមណ្ឌលទិន្នន័យរបស់សហរដ្ឋអាមេរិក។

ជាមួយគ្នានេះ បុគ្គល ៤រូប បានបញ្ជាក់ថា សហរដ្ឋអាមេរិកក៏បានផ្អាកផងដែរនូវការហាមឃាត់ ការលក់រ៉ោតទ័រ (Router) ក្នុងស្រុកដែលផលិតដោយក្រុមហ៊ុន TP-Link និងអាជីវកម្មអ៊ីនធឺណិត នៅសហរដ្ឋអាមេរិករបស់ក្រុមហ៊ុន China Unicom និង China Mobile រួមជាមួយនឹងវិធានការមួយផ្សេងទៀត ដែលនឹងហាមឃាត់ការលក់រថយន្តដឹកទំនិញ និងរថយន្តក្រុងអគ្គិសនីរបស់ចិន នៅសហរដ្ឋអាមេរិក។

គួរបញ្ជាក់ថា ការសម្រេចទាំងនោះ មិនធ្លាប់ត្រូវបានរាយការណ៍ពីមុនមកទេ។ ហើយប្រភពបានប្រាប់ថា ទាំងនេះគឺជាចំណាត់ការចុងក្រោយបង្អស់របស់រដ្ឋបាលលោក Trump ដើម្បីទប់ស្កាត់វិធានការរបស់រដ្ឋាភិបាលអាមេរិក ដែលអាចធ្វើឲ្យទីក្រុងប៉េកាំងខឹងសម្បា បន្ទាប់ពីមានការផ្អាកជម្លោះពាណិជ្ជកម្មដែលសម្រេចបានដោយមេដឹកនាំចិន លោក ស៊ី ជីនពីង (Xi Jinping) និងលោក Trump កាលពីខែតុលាឆ្នាំមុន។ កិច្ចប្រជុំនោះ ក៏រួមបញ្ចូលទាំងការសន្យារបស់ចិន ក្នុងការពន្យារពេលការរឹតបន្តឹងការនាំចេញដ៏តឹងរ៉ឹងលើរ៉ែកម្រ ដែលជាមូលដ្ឋានគ្រឹះនៃការផលិតបច្ចេកវិទ្យាទូទាំងពិភពលោក។

សេតវិមាន និងក្រុមហ៊ុនទូរគមនាគមន៍យក្សរបស់រដ្ឋចិន គឺ China Telecom, China Mobile និង China Unicom មិនបានឆ្លើយតបទៅនឹងសំណើសុំការអត្ថាធិប្បាយអំពីវិធានការទាំងនេះ និងមូលហេតុដែលមានការផ្អាកបម្រាមទាំងនោះទេ។ លោក Trump គ្រោងទៅទស្សនកិច្ចទីក្រុងប៉េកាំង នៅខែមេសា ហើយបានអញ្ជើញលោក ស៊ី ឲ្យទៅទស្សនកិច្ចសហរដ្ឋអាមេរិក នៅចុងឆ្នាំនេះ៕