ក្នុងជំរំមានជនប៉ាឡេស្ទីនជម្លៀសខ្លួនរស់នៅ ស្ថិតក្នុងទីក្រុង Khan Younis តំបន់ហ្កាហ្សា តន្រ្តីករ Hussam Qassem ដែលជាអ្នកវាយស្គរ បាននាំមកនូវបរិកាសសប្បាយរីករាយដល់ក្មេងៗ និងគ្រួសាររបស់ពួកគេ ជាមួយនឹងតន្រ្តីរបស់លោក ដោយរូបលោកវាយឧបករណ៍ភ្លេងធ្វើពីធុងទឹក គ្រឿងបន្លាស់កង់ និងថាសតែ ។

លោក Qassem និយាយថា លោកប្រើប្រាស់តន្រ្តីរបស់លោក ដើម្បីធ្វើឲ្យលែងមានអារម្មណ៍អវិជ្ជមាន និងសម្ពាធផ្លូវចិត្ត ដោយសារស្ថានភាពដែលរូបលោក និងមនុស្សដទៃទៀតកំពុងប្រឈម ក្រោយសង្រ្គាមរយៈពេល ២ឆ្នាំ ។

ក្មេងៗនាំគ្នាទះដៃ និងរាំ ពេលលោក Qassem លេងភ្លេង ។ លោក Bushra al Shafihi គឺជាជនប៉ាឡេស្ទីនមួយរូបមកទស្សនាការលេងភ្លេងនេះ និយាយថា តន្រ្តីផ្តល់បរិយាកាសសប្បាយរីករាយដល់ក្មេងៗ ពីព្រោះថា ពួកគេលែងឃើញមានការលេងភ្លេងបែបនេះ អស់កាលជាយូរមកហើយ ។

លោក Qassem និយាយថា តន្រ្តីគ្រាន់តែជាផ្នែកតូចមួយនៃជីវិតរស់នៅប្រចាំថ្ងៃរបស់លោកប៉ុណ្ណោះ ពីព្រោះថា លោកត្រូវស្វែងរកទឹក តម្រង់ជួរនៅតាមផ្ទះបាយស៊ុប ដើម្បីផ្គត់ផ្គង់អាហារដល់គ្រួសាររបស់លោក ។

រាល់ពេលដែលលោកអង្គុយនៅពីក្រោយឧបករណ៍ភ្លេងកែឆ្នៃរបស់លោក ភ្លាមៗនោះ មនុស្សនៅក្នុងជំរំនាំគ្នាមកមើល ធ្វើឲ្យបរិយាកាសពោពេញដោយស្នាមញញឹម ។

ទេព្យកោសល្យរបស់លោក Qassem ក្នុងការធ្វើឧបករណ៍ភ្លេង មានជាយូរមកហើយ ។ លោកថា ឧបករណ៍ភ្លេងរបស់លោក ត្រូវបានបំផ្លាញ អំឡុងសង្រ្គាមរបស់អ៊ីស្រាអែលនៅតំបន់ហ្កាហ្សាស្រ្ទីប ៕