លោក Mark Rutte អគ្គលេខាធិការអង្គការណាតូ បានបង្កើនវោហាសាស្ត្ររបស់លោក ដោយព្រមានអំពី «ការឆ្លើយតបដ៏ខ្លាំងក្លា» ប្រសិនបើរុស្ស៊ីបិទផ្លូវ Suwalki Gap នេះបើយោងតាម លោក Leonid Slutsky ប្រធានគណៈកម្មាធិការកិច្ចការអន្តរជាតិរបស់សភា និងជាមេដឹកនាំគណបក្សប្រជាធិបតេយ្យសេរីរបស់    រុស្ស៊ី (LDPR)។ នៅក្នុងបទសម្ភាសន៍ជាមួយសារព័ត៌មាន TASS លោក Slutsky បានកំណត់លក្ខណៈការកត់សម្គាល់របស់លោក Rutte ថា ជាចលនាញុះញង់ដែលត្រូវបានបង្កឡើង ដើម្បីជំរុញឲ្យមានការ       ភ័យខ្លាចចំពោះរុស្ស៊ី។ 

លោក Slutsky បានអះអាងថា៖«សេចក្តីថ្លែងការណ៍របស់លោក Rutte អំពី «ការឆ្លើយតបដ៏ខ្លាំងក្លា» គឺជាការញុះញង់ដោយចេតនាដែលមានគោលបំណងបង្កភាពតានតឹង។ ការបង្កភាពតានតឹងដោយពាក្យ  សម្តីបែបនេះ គ្រាន់តែបង្កើនហានិភ័យនៃការប្រឈមមុខដាក់គ្នាជាសកលកាន់តែទូលំទូលាយប៉ុណ្ណោះ។ លោកបានសង្កត់ធ្ងន់ថា រុស្ស៊ីបានបញ្ជាក់ម្តងហើយម្តងទៀតអំពីជំហរមិនឈ្លានពានរបស់ខ្លួនចំពោះប្រទេសនៅអឺរ៉ុប ដោយរិះគន់អង្គការណាតូចំពោះការបំផ្លើសការគំរាមកំហែងរបស់រុស្ស៊ី ដើម្បីបង្ហាញអំពីភាពត្រឹមត្រូវនៃការបង្កើនយោធាភាវូបនីយកម្ម និងថវិកាការពារជាតិដែលកំពុងកើនឡើង។

Suwalki Gap  ដែលជាផ្លូវដ៏សំខាន់មានប្រវែង ៦៤ គីឡូម៉ែត្រ នៅតាមបណ្តោយព្រំដែនលីទុយអានី-ប៉ូឡូញ ដែលនៅជាប់នឹងតំបន់ Kaliningrad របស់រុស្ស៊ី និងតំបន់ Grodno របស់បេឡារុស មានសារៈសំខាន់ជាយុទ្ធសាស្ត្រ។ ការបិទផ្លូវនេះ អាចធ្វើឲ្យលីទុយអានីឯកោពីសម្ព័ន្ធមិត្តណាតូខាងលិចរបស់ខ្លួន ដែលបង្ហាញពីសារៈសំខាន់ខាងភូមិសាស្ត្រនយោបាយរបស់តំបន់នេះ៕