នៅថ្ងៃសុក្រ (ទី១៣ ខែកុម្ភៈ ឆ្នាំ២០២៦) នេះ ក្រុមមន្ត្រីបានប្រាប់ឲ្យដឹងថា មនុស្ស ៣នាក់យ៉ាងតិច បានបាត់បង់ជីវិត ដោយសារគ្រោះថ្នាក់ ទាក់ទងនឹងអាកាសធាតុ នៅប្រទេសបារាំង និងអេស្ប៉ាញ បន្ទាប់ពីព្យុះបានបោកបក់កាត់តំបន់នេះ ដោយកម្លាំងខ្យល់បក់ដ៏ខ្លាំងបានធ្វើឲ្យដើមឈើដួលរលំ បង្កជាទឹកជំនន់ជន់លិចផ្លូវ និងបណ្ដាលឲ្យមនុស្សរាប់ពាន់នាក់គ្មានអគ្គិសនីប្រើប្រាស់។

ខ្យល់បក់ខ្លាំង និងភ្លៀងធ្លាក់ខ្លាំង បានបង្ខំឲ្យលុបជើងហោះហើរ សេវារថភ្លើង និងស្រឡាង កាលពីថ្ងៃទី១២ ខែកុម្ភៈ និងបាននាំមកនូវភាពច្របូកច្របល់នៅតាមផ្លូវថ្នល់នានា នៅភាគខាងត្បូងនៃប្រទេសបារាំង ភាគខាងជើងអេស្ប៉ាញ ហើយនិងផ្នែកខ្លះរបស់ព័រទុយហ្គាល់។

មន្ត្រីអេស្ប៉ាញបានប្រាប់ថា ស្ត្រីម្នាក់បានស្លាប់ បន្ទាប់ពីដំបូលឃ្លាំងឧស្សាហកម្មមួយ បានរលំបាក់សង្កត់លើរូបគេ ខណៈដែលមន្ត្រីបារាំងបានបញ្ជាក់នៅថ្ងៃទី១៣ ខែកុម្ភៈនេះថា មនុស្សម្នាក់បានបាត់បង់ជីវិត បន្ទាប់ពីធ្លាក់ពីលើជណ្ដើរក្នុងសួនច្បាររបស់ខ្លួន មួយថ្ងៃបន្ទាប់ពីអ្នកបើកបរឡានដឹកទំនិញម្នាក់ បានស្លាប់ដែរ នៅពេលដែលដើមឈើមួយដើមបានដួលចំលើកញ្ចក់រថយន្តខាងមុខរបស់គេ។

មនុស្សរាប់សិបនាក់ផ្សេងទៀត ក៏បានរងរបួសផងដែរ នៅក្នុងឧប្បត្តិហេតុទាក់ទងនឹងអាកាសធាតុ នៅក្នុងប្រទេសអេស្ប៉ាញ ហើយស្ពានកាត់ជ្រលងភ្នំមួយ នៅព័រទុយហ្គាល់ បានបាក់រលំផ្នែកខ្លះដោយសារតែទឹកជំនន់។

ទីភ្នាក់ងារព្យាករអាកាសធាតុបារាំង បានឲ្យដឹងថា ព្យុះដែលមានឈ្មោះថា Nils មានកម្លាំងខ្លាំងណាស់ ហើយប្រតិបត្តករអគ្គិសនីរបស់បារាំង បានប្រាប់ថា ខ្លួនបានប្រមូលផ្តុំកម្មករប្រហែល ៣.០០០នាក់ ខណៈពេលដែលខ្លួនបានជួបការលំបាកក្នុងការភ្ជាប់បណ្តាញអគ្គិសនីឡើងវិញទៅកាន់គ្រួសារនានា៕

ទីភ្នាកងារព្យាករអាកាសធាតុ បានបន្ថែមថា ព្យុះនេះបានបក់បោកឆ្ពោះទៅទិសខាងកើតចេញឆ្ងាយពីដែនដីបារាំង កាលពីថ្ងៃទី១២ ខែកុម្ភៈ ប៉ុន្តែតំបន់មួយចំនួននៅតែស្ថិតក្នុងការប្រុងប្រយ័ត្ន ចំពោះទឹកជំនន់៕