ប្រទេសរុស្ស៊ីបានឲ្យដឹងនៅថ្ងៃសុក្រ (ទី១៣ ខែកុម្ភៈ ឆ្នាំ២០២៦) នេះថា កិច្ចចរចាជុំថ្មីជាមួយមន្ត្រីអាមេរិក និងអ៊ុយក្រែន ដែលជាដំណើរការស្វែងរកការសម្របសម្រួល ដើម្បីបញ្ចប់សង្គ្រាមរយៈពេល ៤ឆ្នាំ នឹងធ្វើឡើងនៅសប្តាហ៍ក្រោយ។

កិច្ចចរចា ២ជុំមុននេះ ដែលសម្របសម្រួលដោយសហរដ្ឋអាមេរិក នៅទីក្រុង Abu Dhabi របស់ប្រទេសអេមីរ៉ាតអារ៉ាប់រួម មិនអាចឈានដល់ការទម្លាយភាពទាល់ច្រកណាមួយឡើយ ដោយទីក្រុងមូស្គូ និងគីវ នៅតែមានការខ្វែងគំនិតខ្លាំង អំពីបញ្ហាសំខាន់ ពាក់ព័ន្ធនឹងដែនដី។

អំឡុងពេលនិយាយទៅកាន់អ្នកសារព័ត៌មាន ក្នុងនោះរួមមានទាំងសារព័ត៌មាន AFP ផងដែរ អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា៖ «មានកិច្ចព្រមព្រៀងមួយ ដែលពិតណាស់ វានឹងធ្វើឡើងនៅសប្តាហ៍ក្រោយ។ យើងនឹងជម្រាបជូនអ្នក អំពីទីកន្លែង និងកាលបរិច្ឆេទ»។

គួរបញ្ជាក់ថា ប្រធានាធិបតីអាមេរិក លោក Donald Trump កំពុងជំរុញឲ្យបញ្ចប់ជម្លោះនេះ ដែលបានកើតឡើងនៅពេលដែលរុស្ស៊ីបានចាប់ផ្តើមការវាយលុកយោធាទ្រង់ទ្រាយធំរបស់ខ្លួន នៅក្នុងខែកុម្ភៈ ឆ្នាំ២០២២។

ទីក្រុងមូស្គូបានប្រកាន់ខ្ជាប់នូវការទាមទាររបស់ខ្លួន ដើម្បីឲ្យមានការធ្វើសម្បទានទឹកដី និងនយោបាយយ៉ាងទូលំទូលាយពីអ៊ុយក្រែន ជាអ្វីដែលត្រូវបានបដិសេធដោយទីក្រុងគីវ ដោយចាត់ទុកថា ការធ្វើបែបនោះស្មើនឹងព្រមចុះចាញ់។ រុស្ស៊ីកំពុងជំរុញឲ្យអ៊ុយក្រែនដកចេញពីតំបន់ Donetsk ភាគខាងកើត ដោយប្រហែល ១ភាគ៥ នៃតំបន់នោះ នៅតែត្រូវបានគ្រប់គ្រងដោយកងកម្លាំងរបស់ទីក្រុងគីវ៕