សភាជប៉ុននឹងធ្វើការបោះឆ្នោត នៅថ្ងៃទី១៨ ខែកុម្ភៈ ឆ្នាំ២០២៦ ដើម្បីជ្រើសរើសនាយករដ្ឋមន្ត្រីបន្ទាប់ ដោយលោកស្រីនាយករដ្ឋមន្ត្រី Sanae Takaichi ស្ទើរតែប្រាកដណាស់នឹងទទួលបានជោគជ័យ នៅពេលដែលស្ថាប័ននេះកោះប្រជុំសម្រាប់ការចាប់ផ្តើមនៃសម័យប្រជុំពិសេសរយៈពេល ១៥០ថ្ងៃរបស់សភា នៅថ្ងៃដដែលនោះ។

កាលវិភាគ ដែលត្រូវបានអនុម័តនៅក្នុងការសម្រេចរបស់គណៈរដ្ឋមន្ត្រី នាថ្ងៃសុក្រ (ទី១៣ ខែកុម្ភៈ) នេះ បានកើតឡើងនៅពេលដែលរដ្ឋាភិបាលមានអាយុកាលប៉ុន្មានខែរបស់លោកស្រី Takaichi ក្ដាប់អំណាចកាន់តែខ្លាំងនៅក្នុងសភាតំណាងរាស្ត្រ បន្ទាប់ពីគណបក្សកំពុងកាន់អំណាចរបស់លោកស្រី គឺគណបក្សប្រជាធិបតេយ្យសេរីនិយម (LDP) ទទួលបានជ័យជម្នះជាមួយនឹងសំឡេងដ៏ច្រើនលើសលប់នៅក្នុងការបោះឆ្នោតសភាជាន់ទាប កាលពីថ្ងៃទី៨ ខែកុម្ភៈ។

នាយករដ្ឋមន្ត្រីរូបនេះ ត្រូវបានគេរំពឹងថា នឹងបង្កើតគណៈរដ្ឋមន្ត្រីទី២ របស់លោកស្រី ក្រោយការបោះឆ្នោតនេះ។ ប្រភពរដ្ឋបាលជាន់ខ្ពស់ បានឲ្យដឹងថា លោកស្រីមានបំណងបន្តរក្សាបញ្ជីឈ្មោះគណៈរដ្ឋមន្ត្រីដំបូងរបស់លោកស្រីដដែល ដែលត្រូវបានតែងតាំងនៅពេលដែលលោកស្រីក្លាយជានាយករដ្ឋមន្ត្រីក្នុងខែតុលា ឆ្នាំ២០២៥។

ការអនុម័តកាលវិភាគរបស់គណៈរដ្ឋមន្ត្រីនេះ ធ្វើឡើងបន្ទាប់ពីវាត្រូវបានបញ្ជូនជាផ្លូវការទៅកាន់គណបក្សកាន់អំណាច និងគណបក្សប្រឆាំងដោយរដ្ឋាភិបាល នាព្រឹកថ្ងៃនេះ។

សម័យប្រជុំពិសេសនេះ ត្រូវបានគេរំពឹងថា នឹងមានរយៈពេលយ៉ាងហោចណាស់រហូតដល់ថ្ងៃទី១៧ ខែកក្កដា ដែលត្រូវគ្នានឹងរយៈពេលនៃសម័យប្រជុំធម្មតារបស់សភា ដែលត្រូវបានរំលាយនៅថ្ងៃបើករបស់ខ្លួន ក្នុងខែមករា សម្រាប់ការបោះឆ្នោត។

គួរបញ្ជាក់ថា នៅក្នុងការបោះឆ្នោត គណបក្ស LDP និងដៃគូសម្ព័ន្ធភាពដ៏តូចរបស់ខ្លួន គឺគណបក្សនវានុវត្តន៍ជប៉ុន (JIP) បានឈ្នះ ៣៥២អាសនៈ ដែលច្រើនជាង ២ភាគ៣ នៃសភាជាន់ទាបដ៏មានឥទ្ធិពល ដោយកើនឡើងពីសំឡេងភាគច្រើនស្ដួចស្តើងដែលរដ្ឋាភិបាលចម្រុះមាន មុនពេលបោះឆ្នោត៕