បម្រាមរបស់ចក្រភពអង់គ្លេសលើក្រុមយុទ្ធនាការគាំទ្រប៉ាឡេស្ទីន Palestine Action ដោយចាត់ជាអង្គការភេរវកម្ម ត្រូវបានតុលាការជាន់ខ្ពស់ទីក្រុងឡុងដ៍្រ សម្រេចថា គឺខុសច្បាប់ នៅថ្ងៃសុក្រ (ទី១៣ ខែកុម្ភៈ ឆ្នាំ២០២៦) តែការហាមឃាត់នេះ នឹងនៅតែមានដដែលជាបណ្តោះអាសន្ន ហើយរដ្ឋាភិបាលបានឲ្យដឹងថា ខ្លួននឹងប្តឹងឧទ្ធរណ៍ជំទាស់នឹងការសម្រេចនេះ។

Palestine Action ត្រូវបានចាត់ទុកជាអង្គការខុសច្បាប់នៅក្នុងខែកក្កដាឆ្នាំមុន ដោយក្រុមនេះ បានចាត់វិធានការដោយផ្ទាល់កាន់តែខ្លាំងឡើងៗ លើក្រុមហ៊ុនការពារជាតិមានទំនាក់ទំនងជាមួយអ៊ីស្រាអែល នៅក្នុងប្រទេសអង់គ្លេស ដែលជារឿយៗទៅរារាំងនៅច្រកចូល ឬបាញ់ថ្នាំពណ៌ក្រហម។

ចក្រភពអង់គ្លេសបានអះអាងថា សកម្មភាពកើនឡើងជាលំដាប់របស់ក្រុមនេះ ស្មើនឹងភេរវកម្ម។ ការប្រព្រឹត្តិទាំងនោះ រួមមានការវាយឆ្មក់នៅឆ្នាំ២០២៤ លើក្រុមហ៊ុនការពារជាតិធំបំផុតរបស់អ៊ីស្រាអែល Elbit Systems ដែលរដ្ឋអាជ្ញាបានឲ្យដឹងថា សកម្មជនបានបង្កការខូចខាតប្រហែល ១លានផោន ហើយមន្ត្រីនគរបាលម្នាក់ត្រូវបានវាយដោយញញួរ។ ទង្វើទាំងនោះបានឈានដល់ចំណុចខ្លាំងបំផុត នៅពេលដែលមានការសម្រុកចូលមូលដ្ឋានទ័ពអាកាស Brize Norton របស់កងទ័ពអាកាសអង់គ្លេស កាលពីខែមិថុនា។

មេធាវីតំណាងឲ្យលោកស្រី Huda Ammori ដែលជាសហស្ថាបនិកចលនា Palestine Action ក្នុងឆ្នាំ២០២០ បានជំទាស់នៅឯសវនាការកាលពីឆ្នាំមុនថា ចំណាត់ការនេះ គឺជាការរឹតត្បិតយ៉ាងខ្លាំង ចំពោះសិទ្ធិតវ៉ា។ ដោយផ្តល់សេចក្តីសង្ខេបនៃសេចក្តីសម្រេចរបស់តុលាការ លោកស្រីចៅក្រម Victoria Sharp បានបញ្ជាក់ថា «Palestine Action គឺជាក្រុមមួយដែលលើកកម្ពស់បុព្វហេតុនយោបាយរបស់ខ្លួន តាមរយៈឧក្រិដ្ឋកម្ម និងការលើកទឹកចិត្តឲ្យមានឧក្រិដ្ឋកម្ម”។

ប៉ុន្តែតុលាការជាន់ខ្ពស់ បានសម្រេចថា ការហាមឃាត់នេះ គឺជាការជ្រៀតជ្រែកមិនសមាមាត្រនឹងសិទ្ធិសេរីភាពនៃការបញ្ចេញមតិ និងសេរីភាពនៃការជួបជុំ។ យ៉ាងណាក្ដី ការហាមឃាត់នេះ នឹងនៅតែមានសុពលភាព រហូតដល់មានការប្តឹងឧទ្ធរណ៍ណាមួយ ដែលមានន័យថា ការបង្ហាញការគាំទ្រនៅតែជាបទល្មើសព្រហ្មទណ្ឌ ហើយការធ្វើជាសមាជិករបស់ក្រុមនេះមានទោសជាប់ពន្ធនាគារយូរបំផុត ១៤ឆ្នាំ៕