ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃសុក្រ ទី១៣ ខែកុម្ភៈ បានអំពាវនាវឱ្យមានការបង្កើនកញ្ចប់ជំនួយយោធា និងទណ្ឌកម្មលើរុស្ស៊ី ខណៈលោកបានចូលរួមក្នុងកិច្ចពិភាក្សាទ្វេភាគីជាមួយមេដឹកនាំជាច្រើនរូបក្នុងអំឡុងសន្និសីទសន្តិសុខទីក្រុង Munich ប្រទេសអាល្លឺម៉ង់។

លោក Zelenskyy បាននិយាយក្នុងអំឡុងពេលកិច្ចពិភាក្សាទ្វេភាគីជាមួយនាយករដ្ឋមន្ត្រីន័រវេស លោក Jonas Gahr Store ថា «ដោយឡែកពីគ្នា យើងនឹងធ្វើការលើមីស៊ីលសម្រាប់ការការពារដែនអាកាស។ យើងក៏នឹងធ្វើការលើរឿងជាច្រើនទៀតដើម្បីពង្រឹងយោធារបស់យើង និងកញ្ចប់ជំនួយផ្នែកយោធា»។ លោក Zelenskyy ក៏បានជួបពិភាក្សាជាមួយនាយករដ្ឋមន្ត្រីដាណឺម៉ាក លោកស្រី Mette Frederiksen និងប្រធានាធិបតីហ្វាំងឡង់ លោក Alexander Stubb ដោយផ្តោតលើការពង្រឹងសមត្ថភាពការពារជាតិរបស់អ៊ុយក្រែន។

ប្រធានាធិបតីអ៊ុយក្រែន លោក Volodymyr Zelenskiy បាននិយាយថា មេដឹកនាំបានធ្វើឱ្យមាន «វឌ្ឍនភាពដ៏ធំ» នៅក្នុងការពិភាក្សាលើចំណាត់ការបន្ទាប់ដើម្បីបង្កើនសម្ពាធលើរុស្ស៊ី និងពង្រឹងការសម្របសម្រួលអន្តរជាតិដើម្បីបញ្ចប់សង្គ្រាមនៅអ៊ុយក្រែន បន្ទាប់ពីកិច្ចប្រជុំដែលបានធ្វើឡើងនៅខាងក្រៅសន្និសីទសន្តិសុខទីក្រុង Munich។ លោកបាននិយាយថា «យើងបានពិភាក្សាគ្នាពីជំហានបន្ទាប់ របៀបដាក់សម្ពាធលើរុស្ស៊ីឲ្យបញ្ឈប់សង្គ្រាមនេះ របៀបធ្វើឲ្យអាមេរិកចូលរួមកាន់តែច្រើន» ហើយអ្នកចូលរួមបានព្រមព្រៀងបន្តធ្វើការជាមួយគ្នា។ ការលើកឡើងរបស់លោកធ្វើឡើងនៅពេលមានការជួបប្រជុំនៅទីក្រុង Munich ដែលបានបង្ហាញពីភាពតានតឹងកាន់តែខ្លាំងឡើងរវាងអឺរ៉ុប និងទីក្រុងវ៉ាស៊ីនតោន ដោយមេដឹកនាំកំពុងជជែកវែកញែកអំពីអនាគតនៃសម្ព័ន្ធមិត្តលោកខាងលិច និងកិច្ចសហប្រតិបត្តិការសន្តិសុខនៅក្នុងទិដ្ឋភាពភូមិសាស្ត្រនយោបាយដែលមានការផ្លាស់ប្តូរយ៉ាងឆាប់រហ័ស។