លោក Friedrich Merz អធិការបតីអាល្លឺម៉ង់ បាននិយាយកាលពីថ្ងៃសុក្រ (១៣ កុម្ភៈ) ថា ទីក្រុងប៊ែរឡាំង បានចាប់ផ្តើមកិច្ចពិភាក្សាជាមួយបារាំង អំពីការទប់ស្កាត់នុយក្លេអ៊ែររបស់អឺរ៉ុប ហើយលោកប្រធានាធិបតីបារាំង Emmanuel Macron បាននិយាយថា ទ្វីបអឺរ៉ុបត្រូវតែក្លាយជាមហាអំណាចភូមិសាស្ត្រនយោបាយ ដោយសារតែការគំរាមកំហែងរបស់រុស្ស៊ីនឹងមិនរលាយបាត់នោះឡើយ ខណៈដែលសម្លឹងមើលក្របខណ្ឌសន្តិសុខថ្មី ស្របពេលទីក្រុងវ៉ាស៊ីនតោន បង្ហាញភាពមិនច្បាស់លាស់ចំពោះការប្ដេជ្ញាចិត្តរបស់ខ្លួនលើទ្វីបនេះ។

ថ្លែងនៅទីក្រុង Munich លោក Merz បាននិយាយថា អឺរ៉ុបត្រូវរឹងមាំកាន់តែខ្លាំង ដើម្បីកំណត់ទំនាក់ទំនងរបស់ខ្លួនជាមួយអាមេរិកឡើងវិញ ដោយព្រមានថា អាមេរិក មិនអាចធ្វើគ្រប់យ៉ាងតែម្នាក់ឯងបានទេ នៅពេលសណ្តាប់ធ្នាប់សកលពីមុន ដួលរលំ។ ក្រោយមក លោក Macron បានថ្លែងថា គឺដល់ពេលហើយដែលអឺរ៉ុបត្រូវតែមានភាពម៉ឺងម៉ាត់ជាងមុន និងត្រៀមលក្ខណៈដោយខ្លួនឯង ជាមួយនឹងស្ថាបត្យកម្មសន្តិសុខដ៏រឹងមាំជាងមុន។

សុន្ទរកថាទាំងនេះគូសបញ្ជាក់ថា មេដឹកនាំអឺរ៉ុបកំពុងសម្លឹងរកមើលផ្លូវឯករាជ្យកាន់តែខ្លាំងឡើង បន្ទាប់ពីរយៈពេលមួយឆ្នាំនៃភាពរកាំរកូសដែលមិនធ្លាប់មានពីមុនមក ក្នុងទំនាក់ទំនងឆ្លងមហាសមុទ្រអាត្លង់ទិក ខណៈអឺរ៉ុប ក៏ខិតខំរក្សាសម្ព័ន្ធភាពជាមួយទីក្រុងវ៉ាស៊ីនតោនផងដែរ។ ក្រៅពីបញ្ហាទាំងនេះ អឺរ៉ុបកំពុងប្រឈមនូវរឿងរ៉ាវរាប់មិនអស់ ចាប់ពីអ្វីដែលខ្លួនហៅថា ការគំរាមកំហែងពីរុស្ស៊ី រួមទាំងបញ្ហាសង្រ្គាមនៅអ៊ុយក្រែន រហូតដល់ការរង្គោះរង្គើយ៉ាងខ្លាំងក្នុងពាណិជ្ជកម្មពិភពលោក។

លោក Merz បាននិយាយថា «លោកបានចាប់ផ្តើមកិច្ចពិភាក្សាដោយសម្ងាត់ ជាមួយប្រធានាធិបតីបារាំង ស្តីពីការទប់ស្កាត់នុយក្លេអ៊ែររបស់អឺរ៉ុប ហើយអាល្លឺម៉ង់នឹងមិនអនុញ្ញាតឱ្យតំបន់សន្តិសុខផ្សេងៗគ្នាលេចឡើងនៅអឺរ៉ុបនោះទេ»។ បណ្តាប្រទេសនៅអឺរ៉ុប ពឹងផ្អែកយ៉ាងខ្លាំងជាយូរមកហើយលើអាមេរិក រួមទាំងឃ្លាំងអាវុធនុយក្លេអ៊ែរដ៏ធំរបស់ខ្លួន សម្រាប់ការការពារ ប៉ុន្តែបានបង្កើនការចំណាយលើយោធា ដែលមួយផ្នែកគឺជាការឆ្លើយតបនឹងការរិះគន់ខ្លាំងៗពីរដ្ឋបាលលោកប្រធានាធិបតី Donald Trump៕