សមាជិកព្រឹទ្ធសភាមកពីបក្សប្រជាធិបតេយ្យ ចំនួនពីររូប បានជំរុញឱ្យរដ្ឋបាលលោកប្រធានាធិបតីអាមេរិក Donald Trump បោះបង់ចោលនូវសំណើមួយដែលទាមទារឱ្យភ្ញៀវទេសចរបរទេសរាប់លាននាក់ ផ្តល់ឯកសារនៃការប្រើប្រាស់ប្រព័ន្ធបណ្ដាញសង្គមរបស់ពួកគេ សម្រាប់រយៈពេល ៥ឆ្នាំកន្លងមក។

គោលនយោបាយនេះត្រូវបានស្នើឡើងដោយទីភ្នាក់ងារគយ និងការពារព្រំដែនសហរដ្ឋអាមេរិក ហៅកាត់ថា CBP ដែលនឹងតម្រូវឱ្យអ្នកធ្វើដំណើរមកពីប្រទេសនានាក្នុងកម្មវិធីលើកលែងទិដ្ឋាការ ត្រូវដាក់ឯកសារទិន្នន័យបណ្ដាញសង្គមដែលពួកគេប្រើប្រាស់។

ព្រឹទ្ធសមាជិកទាំងពីររូបនោះ គឺលោក Ed Markey និង Ron Wyden បាននិយាយថា ការតម្រូវឱ្យអ្នកធ្វើដំណើរបង្ហាញព័ត៌មានបណ្ដាញសង្គមផ្ទាល់ខ្លួន ការិយាល័យ CBP នឹងបង្ខំអ្នកដែលគ្រាន់តែចង់ទៅលេងក្រុមគ្រួសារនៅអាមេរិក ធ្វើអាជីវកម្មជាមួយក្រុមហ៊ុនអាមេរិក ឬចូលរួមព្រឹត្តិការណ៍នានាដូចជា World Cup នាពេលខាងមុខ ត្រូវជួបនឹងការឃ្លាំមើលឌីជីថលយ៉ាងទូលំទូលាយ។ ព្រឹទ្ធសមាជិកទាំងពីរបន្តថា ប្រសិនបើប្រទេសនានាដូចជាចក្រភពអង់គ្លេស បារាំង ឬអូស្ត្រាលី ដាក់ចេញនូវគោលនយោបាយស្រដៀងគ្នានេះលើអ្នកទេសចរអាមេរិកវិញ នោះអាមេរិកក៏ច្បាស់ជាខឹងសម្បាមិនខាន។

ក្រសួងសន្តិសុខមាតុភូមិអាមេរិក មិនបានធ្វើអត្ថាធិប្បាយភ្លាមៗទេ។ កាលពីខែធ្នូ ក្រសួងនេះបាននិយាយថា សំណើនេះអាចចូលជាធរមានដើមខែកុម្ភៈនេះ។ អ្នកដាក់ពាក្យសុំទិដ្ឋាការអន្តោប្រវេសន៍ និងទិដ្ឋាការមិនមែនអន្តោប្រវេសន៍ ត្រូវបានតម្រូវឱ្យចែករំលែកព័ត៌មាននោះចាប់តាំងពីឆ្នាំ ២០១៩ មក។ 

ទីក្រុងវ៉ាស៊ីនតោន បានចាត់វិធានការរឹតបន្តឹងការត្រួតពិនិត្យលើជនបរទេស ក្រោមក្រឹត្យខែមករា ឆ្នាំ២០២៥ របស់លោក Trump ដែលអំពាវនាវឱ្យភ្ញៀវទេសចរដែលទៅទស្សនាអាមេរិក ត្រូវតែមាន «ការត្រួតពិនិត្យ និងពិនិត្យពិច័យក្នុងកម្រិតអតិបរមា»។ កម្មវិធីលើកលែងទិដ្ឋាការអនុញ្ញាតនោះ ឱ្យអ្នកធ្វើដំណើរមកពី ៤២ ប្រទេស ភាគច្រើននៅអឺរ៉ុប អាចទៅទស្សនាអាមេរិក បានរហូតដល់ ៩០ ថ្ងៃដោយមិនចាំបាច់មានទិដ្ឋាការ៕