យោងតាមប្រព័ន្ធផ្សព្វផ្សាយរដ្ឋរបស់ចិន បានរាយការណ៍នៅថ្ងៃសៅរ៍ (១៤ កុម្ភៈ) នេះថា ប្រទេសចិន នឹងអនុវត្តការអនុគ្រោះ «ពន្ធសូន្យ» សម្រាប់ការនាំចូលពីប្រទេសអាហ្វ្រិកចំនួន ៥៣ ដែលខ្លួនមានទំនាក់ទំនងការទូតជាមួយ ដោយចាប់ផ្តើមពីថ្ងៃទី១ ខែឧសភា ឆ្នាំ២០២៦ នេះតទៅ។

របាយការណ៍ទូរទស្សន៍រដ្ឋបានឱ្យដឹងទៀតថា ប្រទេសចិន ក៏នឹងបន្តជំរុញកិច្ចចរចា និងការចុះហត្ថលេខាលើកិច្ចព្រមព្រៀងនៃភាពជាដៃគូសេដ្ឋកិច្ចរួមគ្នា ព្រមទាំងពង្រីកបន្ថែមទៀតនូវការចូលប្រើប្រាស់ទីផ្សារ សម្រាប់ការនាំចេញរបស់អាហ្វ្រិកទៅកាន់ប្រទេសចិន តាមរយៈយន្តការដែលបានធ្វើឱ្យប្រសើរឡើងដូចជា «បណ្តាញបៃតង» របស់ខ្លួន។

ចិន បានសន្យាកាលពីខែមិថុនាកន្លងទៅថា នឹងផ្តល់ការអនុគ្រោះពន្ធគយ ១០០% ដល់ប្រទេសចំនួន ៥៣ នៅអាហ្វ្រិក ដែលរក្សាចំណងការទូតជាមួយទីក្រុងប៉េកាំង។ ការប្តេជ្ញាចិត្តមិនយកពន្ធនេះ ត្រូវបានប្រកាសជាលើកដំបូងក្នុងខែមិថុនាឆ្នាំមុន ដោយលោកប្រធានាធិបតី ស៊ី ជីនពីង នៅក្នុងកិច្ចប្រជុំរដ្ឋមន្ត្រីមួយក្រោមវេទិកាស្តីពីកិច្ចសហប្រតិបត្តិការចិន-អាហ្វ្រិក។

ក្នុងចំណោមប្រទេសសរុបចំនួន ៥៤ របស់ទ្វីបអាហ្វ្រិក មានតែប្រទេសអេស្វាទីនីប៉ុណ្ណោះ ដែលមិនរក្សាទំនាក់ទំនងការទូតជាមួយចិន ដែលធ្វើឱ្យអាហ្វ្រិកខាងត្បូង មានសិទ្ធិទទួលបានគោលនយោបាយនេះ។ កាលពីដើមសប្ដាហ៍នេះ ចិន និងអាហ្វ្រិកខាងត្បូង បានចុះកិច្ចព្រមព្រៀងពាណិជ្ជកម្មក្របខណ្ឌមួយ ដែលនឹងផ្តល់ឱ្យការនាំចេញរបស់អាហ្វ្រិកខាងត្បូង ដោយមិនគិតពន្ធនោះទេលើគ្រប់ប្រភេទផលិតផល នៅពេលកិច្ចព្រមព្រៀងនេះចូលជាធរមាន៕