ភ្នំពេញ​៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ​នៅរសៀល​ថ្ងៃទី១៨ ខែមីនា ឆ្នាំ២០២២នេះ បានជួបពិភាក្សាការងារជាមួយលោកDavid Arnold ប្រធាន និងជានាយកប្រតិបត្តិមូលនិធិអាស៊ី Asia Foundation ដោយកិច្ចជំនួបនេះ​បានពិភាក្សា​គ្នាជាច្រើនទាក់ទង​ និងការអភិវឌ្ឍនៅកម្ពុជាក្រោមការផ្តួចផ្តើមរបស់អង្គការនេះ។

ក្នុងកិច្ចជំនួបនោះសម្ដេចក្រឡាហោម ស ខេង ឧបនាយរដ្ឋមន្រ្តីបានថ្លែងអំណរគុណ​អង្គការមូលនិធិ Asia Foundation ដែលចាប់តាំងពីមានវត្តមាន​នៅកម្ពុជាជាច្រើនទសវត្សរ៍​បានចូលរួមចំណែកយ៉ាងច្រើន​ដល់ការអភិវឌ្ឍនៅកម្ពុជា​តាមរយៈកម្មវិធីសំខាន់ៗរាប់ទាំង​វិស័យរដ្ឋ និងឯកជន ការគាំទ្រយុវជន គាំទ្រការងារអភិបាលកិច្ចនៅមូលដ្ឋាន រួមទាំងផ្នែកខ្លះ​ពាក់ព័ន្ធការងារពង្រឹងគណនេយ្យភាពសង្គមនៅថ្នាក់ក្រោមជាតិដែលពាក់ព័ន្ធសមត្ថកិច្ចទទួលខុសត្រូវមួយផ្នែករបស់ក្រសួងមហាផ្ទៃផងដែរ។

សម្ដេចបានក៏បានសម្ដែងក្ដីសង្ឃឹមជឿជាក់ថា កិច្ចសហប្រតិបត្តិការរវាងកម្ពុជា និងអង្គការAsia Foundation និយាយជារួម និងដោយឡែកជាមួយក្រសួង​មហាផ្ទៃកម្ពុជានឹង​បន្តរីកចំរើនលូតលាស់​កាន់តែខ្លាំងក្លាថែមទៀត​នៅក្នុងក្របខណ្ឌកិច្ចសហប្រតិបត្តិការ​ក៏ដូចជាក្នុងសមត្ថកិច្ច ឬវិសាលភាពការងាររបស់ក្រសួងហាផ្ទៃ និងជាវិសាលភាពការងារ និងការទទួលខុសត្រូវរបស់អង្គការ Asia Foundation តទៅអនាគត។

ជាមួយគ្នានោះដែរ​លោកDavid Arnold បានសម្ដែងនូវសេចក្ដីរីករាយ និងបានជម្រាប​សម្ដេចក្រឡាហោមថា​ជាការពិតដូចអ្វីដែលសម្ដេចបានលើកឡើង អង្គការAsia Foundation បានធ្វើការងារលើវិស័យជាច្រើននៅកម្ពុជា ទាំងវិស័យអប់រំ ការលើកកម្ពស់យុវជន ការលើកកម្ពស់សមត្ថភាពនារីជាដើម ក្នុងនោះក៏មានកិច្ចសហប្រតិបត្តិការ​ទាក់ទងនឹងសមត្ថកិច្ច​ទទួលខុសត្រូវរបស់ក្រសួងមហាផ្ទៃ ពាក់ព័ន្ធនឹងការងារពង្រឹងគណនេយ្យភាពសង្គម ហៅកាត់ថា ISAF។

លោកក៏បានចូលរួមអបអរសាទរ​ជាមួយសម្ដេចក្រឡាហោម ដែលនៅថ្ងៃទី២១ ខែមីនា ខាងមុខនេះ រាជរដ្ឋាភិបាលកម្ពុជានឹងដាក់ឱ្យដំណើរការផែនការជាតិរយៈពេល១០ឆ្នាំបន្តទៀត ដែលនេះជាសមិទ្ធផលមួយក្នុងកំណែទម្រង់វិមជ្ឈការ និងវិសហមជ្ឈការនៅកម្ពុជា។ លោកក៏យកឱកាសនេះចូលរួមជាមួយសម្ដេចក្រឡាហោមចំពោះការដាក់ឱ្យអនុវត្តផែនការ១០ឆ្នាំដំណាក់កាលទី២នេះផងដែរ។ ក្រៅពីនេះលោក Asi David Arnold ក៏បានសម្ដែងនូវការអរគុណ​ចំពោះសម្ដេចក្រឡាហោម និងអង្គភាពពាក់ព័ន្ធរបស់ក្រសួងមហាផ្ទៃ​ដែលតែងតែផ្ដល់នូវកិច្ចសហការ​យ៉ាងល្អ​ប្រសើរដល់ប្រតិបត្តិការរបស់អង្គការមូលនិធិ Asia Foundation នៅកម្ពុជា។

សម្ដេចក្រឡាហោមក៏បានសេចក្ដីរីករាយចំពោះការចូលរួមចំណែករបស់អង្គការ AsiaFoundation នៅលើវិស័យសំខាន់ៗនៅកម្ពុជា។ សម្ដេចក៏មានក្ដីសង្ឃឹមថា ពាក់ព័ន្ធនឹងសមត្ថកិច្ចក្រសួងមហាផ្ទៃតទៅអនាគតនឹងមានកិច្ចសហប្រតិបត្តិការកាន់តែច្រើនឡើងថែមទៀតជាមួយអង្គការ AsiaFoundation ពិសេសលើការងារកំណែទម្រង់វិមជ្ឈការ និងវិសហមជ្ឈការ ដោយសម្ដេចផ្ទាល់ក៏ត្រៀមខ្លួន​ជានិច្ចក្នុងការពិភាក្សា​ទៅលើបញ្ហាផ្សេង​ក្នុងករណីមានត្រូវការផងដែរ៕ អត្ថបទ៖ បាន ចក់