អាហ្វហ្គានីស្ថាន៖ មន្ត្រីកម្មវិធីស្បៀងអាហារពិភពលោកព្រួយបារម្ភថា សង្គ្រាមនៅអ៊ុយក្រែននឹងធ្វើឱ្យតម្លៃស្បៀងអាហារ និងប្រេងឥន្ធនៈកើនឡើងបន្ថែមទៀតនៅក្នុងប្រទេសអាហ្វហ្គានីស្ថានដែល ៩៥ភាគរយនៃប្រជាជនអាហ្វហ្គានីស្ថានមិនអាចមានលទ្ធភាពគ្រប់គ្រាន់ ក្នុងការផ្គត់ផ្គង់អាហារបានសមរម្យ។
នៅក្នុងបទសម្ភាសន៍មួយកាលពីថ្ងៃសុក្រលោកស្រី Shelley Thakral អ្នកនាំពាក្យរបស់កម្មវិធីស្បៀងអាហារពិភពលោកបាននិយាយថា តម្លៃម្ហូបអាហារនៅក្នុងប្រទេសអាហ្វហ្គានីស្ថានបានកើនឡើងរួចទៅហើយ ៤០ភាគរយ ហើយនឹងមានហានិភ័យនៃការកើនឡើងតម្លៃទំនិញបន្ថែមទៀត។ នៅឆ្នាំនេះអង្គការស្បៀងអាហារពិភពលោក (WFP) បានចំណាយប្រាក់រួចហើយចំនួន ១ពាន់លានដុល្លារសម្រាប់ផ្តល់ស្បៀងអាហារ ដល់ប្រជាជនអាហ្វហ្គានីស្ថានរាប់លាននាក់ ប៉ុន្តែត្រូវការថវិកា ១.៦ពាន់លានដុល្លារទៀត។ ខណៈការផ្គត់ផ្គង់ស្រូវសាលីភាគច្រើនរបស់អាហ្វហ្គានីស្ថានមកពីប្រទេសកាហ្សាក់ស្ថាន និងអ៊ូសបេគីស្ថាន លោកស្រី Thakral បាននិយាយថា ការកើនឡើងតម្លៃស្បៀងអាហារ និងឥន្ធនៈដែលជាលទ្ធផលនៃសង្គ្រាមនៅអ៊ុយក្រែនអាចបន្ថែមដល់ទៅ ១០ ទៅ ២០ភាគរយនៃតម្លៃផ្តល់ជំនួយមនុស្សធម៌។
ប្រជាជនអាហ្វហ្គានីស្ថានភាគច្រើន បច្ចុប្បន្ននេះស្ថិតនៅក្រោមកម្រិតនៃភាពក្រីក្រដែលមានន័យថា ពួកគេរកចំណូលបាន ១.៩០ដុល្លារក្នុងមួយថ្ងៃ ឬតិចជាងនេះ ហើយប្រជាជនភាគច្រើនគ្មានការងារធ្វើ។ លោកស្រី Thakral និយាយថា ៨០ភាគរយនៃប្រជាជនអាហ្វហ្គានីស្ថាន ជាប់ជំពាក់បំណុលដោយសារពួកគេត្រូវខ្ចីប្រាក់ដើម្បីចំណាយលើអាហារ ឬថ្នាំពេទ្យ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
