រដ្ឋមន្ត្រីការបរទេសអារ៉ាប៊ីសាអ៊ូឌីត លោក Faisal bin Farhan បានអំពាវនាវឱ្យបញ្ឈប់ជាបន្ទាន់នូវការកាប់សម្លាប់ក្នុងតំបន់ហ្កាហ្សា និងកសាងតំបន់ប៉ាឡេស្ទីនមួយនេះឡើងវិញ ដោយនិយាយថា «ការស្លាប់នៅក្នុងតំបន់ហ្កាហ្សា មិនទាន់បានបញ្ឈប់នៅឡើយទេ» បើទោះបីជាមានកិច្ចព្រមព្រៀងឈប់បាញ់ជាមួយអ៊ីស្រាអែល តាំងតែពីឆ្នាំមុនក៏ដោយ។

ថ្លែងកាលពីថ្ងៃសុក្រ (១៣ កុម្ភៈ) ក្នុងអំឡុងកិច្ចពិភាក្សាមួយនៅសន្និសីទសន្តិសុខទីក្រុង Munich រដ្ឋមន្ត្រីរូបនេះនិយាយថា បទឈប់បាញ់បានបរាជ័យ មិនអាចបញ្ចប់ការស្លាប់នៅតំបន់ហ្កាហ្សាបាន ដោយសង្កត់ធ្ងន់លើតម្រូវការក្នុងការបញ្ឈប់អំពើហិង្សា និងចាប់ផ្តើមកសាងឡើងវិញនូវទឹកដីដែលត្រូវបានបំផ្លិចបំផ្លាញមួយនេះ។ 

កិច្ចព្រមព្រៀងឈប់បាញ់នៅថ្ងៃទី១០ ខែតុលា ឆ្នាំ២០២៥ បានបញ្ចប់សង្គ្រាម ២ឆ្នាំរបស់អ៊ីស្រាអែល ប្រឆាំងនឹងក្រុមហាម៉ាស ដែលចាប់ផ្តើមនៅខែតុលា ឆ្នាំ២០២៣។ អាជ្ញាធរប៉ាឡេស្ទីននិយាយថា ជម្លោះនេះបានសម្លាប់ជនជាតិប៉ាឡេស្ទីនជាង ៧២.០០០នាក់ បង្ករបួសជាង ១៧ម៉ឺននាក់ និងបង្កការបំផ្លិចបំផ្លាញយ៉ាងទូលំទូលាយ ដោយប៉ះពាល់ដល់ហេដ្ឋារចនាសម្ព័ន្ធស៊ីវិល ៩០%។ អង្គការសហប្រជាជាតិ ប៉ាន់ប្រមាណថា ការចំណាយលើការកសាងឡើងវិញមានចំនួនប្រហែល ៧០ពាន់លានដុល្លារ។

យោងតាមអាជ្ញាធរសុខាភិបាលហ្កាហ្សា មានជនជាតិប៉ាឡេស្ទីនជិត ៦០០នាក់ ត្រូវបានសម្លាប់ និងជាង ១.៥០០នាក់ ផ្សេងទៀតបានរងរបួស នៅក្នុងការវាយប្រហាររបស់អ៊ីស្រាអែល ចាប់តាំងពីបទឈប់បាញ់មក៕