លោក Marco Rubio រដ្ឋមន្ត្រីការបរទេសសហរដ្ឋអាមេរិកកាលពីថ្ងៃសៅរ៍ បានជួបជាមួយប្រធានាធិបតីអ៊ុយក្រែន Volodymyr Zelenskyy នៅខាងក្រៅសន្និសីទសន្តិសុខទីក្រុង Munich ខណៈលោក Zelenskyy បានប្រឆាំងនឹងអ្វីដែលលោកបានពិពណ៌នាថាជាការផ្តោតលើការសម្របសម្រួលរបស់សហរដ្ឋអាមេរិកលើអ៊ុយក្រែនជាជាងការដាក់សម្ពាធលើរុស្ស៊ីក្នុងកិច្ចខិតខំប្រឹងប្រែងដើម្បីបញ្ចប់ជម្លោះនៅអ៊ុយក្រែន។

លោក Rubio បាននិយាយថា លោកទាំងពីរបានពិភាក្សាអំពីសន្តិសុខរបស់អ៊ុយក្រែន និងការពង្រឹងភាពជាដៃគូការពារជាតិ និងសេដ្ឋកិច្ចរវាងអាមេរិក និង អ៊ុយក្រែន។

កិច្ចប្រជុំរបស់លោកទាំងពីរកើតឡើងបន្ទាប់ពីលោក Rubio បានលុបចោលការចូលរួមកិច្ចពិភាក្សាជាមួយមេដឹកនាំអឺរ៉ុបស្តីពីអ៊ុយក្រែននៅក្នុងសន្និសីទ ដែលទំនងជាបង្ហាញពីការចាប់អារម្មណ៍ថយចុះរបស់ទីក្រុងវ៉ាស៊ីនតោនក្នុងការចូលរួមជាមួយអឺរ៉ុបក្នុងកិច្ចចរចាសន្តិភាពអ៊ុយក្រែន ខណៈលោក Zelenskyy ដែលបានជំរុញជាយូរមកហើយសម្រាប់តួនាទីអឺរ៉ុបកាន់តែទូលំទូលាយ បានរិះគន់សហរដ្ឋអាមេរិកចំពោះការដាក់សម្ពាធមិនសមាមាត្រលើអ៊ុយក្រែននៅក្នុងសុន្ទរកថារបស់លោកមុនទៅកាន់ការជួបជុំនោះ។  

លោក Zelenskyy បាននិយាយនៅក្នុងសុន្ទរកថារបស់លោកថា អាមេរិកច្រើនតែផ្ដោតលើប្រធានបទការធ្វើសម្បទាន ។ លោកថាមិនមែនរុស្ស៊ីទេ តែជាអ៊ុយក្រែនទៅវិញដែលអាមេរិក តែងជំរុញឲ្យធ្វើសម្បាទាន ៕