រុស្ស៊ី កាលពីថ្ងៃសៅរ៍ ១៤ កុម្ភៈ បានទាត់ចោលយ៉ាងដាច់ណាត់ចំពោះការអះអាងរបស់ក្រុមសម្ព័ន្ធមិត្តអឺរ៉ុបដែលថាអ្នករិះគន់វិមានក្រឹមឡាំងលោក Alexei Navalny ត្រូវបានសម្លាប់ដោយរុស្ស៊ីដោយប្រើជាតិពុលម្យ៉ាងយកពីសត្វកញ្ចាញ់ចេក ពេលកំពុងត្រូវបានឃុំខ្លួននៅក្នុងអាណានិគមពន្ធនាគារអាកទិក ក្នុងឆ្នាំ២០២៤ អំឡុងទទួលទោសជាប់ពន្ធនាគារ១៩ឆ្នាំ។

នៅក្នុងសេចក្តីថ្លែងការណ៍រួមមួយ ចក្រភពអង់គ្លេស បារាំង អាល្លឺម៉ង់ ស៊ុយអែត និងហូឡង់បាននិយាយថា ការវិភាគគំរូពីសាកសពរបស់លោក Navalny បានបញ្ជាក់ពីវត្តមានរបស់សារធាតុពុល Epibatidine ជាជាតិពុលដែលត្រូវបានរកឃើញលើខ្លួនសត្វកញ្ចាញ់ចេកនៅអាមេរិកខាងត្បូង ។ 

យោងតាមទីភ្នាក់ងារសារព័ត៌មាន TASS របស់រដ្ឋរុស្ស៊ី រដ្ឋាភិបាលរុស្ស៊ី ដែលបានបដិសេធម្តងហើយម្តងទៀតនូវការទទួលខុសត្រូវណាមួយចំពោះការស្លាប់របស់លោក Navalny បានច្រានចោលការចោទប្រកាន់ចុងក្រោយបំផុតថាជា "ការបោកប្រាស់ឃោសនារបស់លោកខាងលិច" ខណៈស្ថានទូតរុស្ស៊ីប្រចាំទីក្រុងឡុងដ៍្របាននិយាយថា សាកសួរទៅមើលថាតើមនុស្សប្រភេទណាដែលនឹងជឿរឿងមិនសមហេតុផលអំពីជាតិពុលបានពីសត្វកញ្ចាញ់ចេកបែបនេះ។

សេចក្តីថ្លែងការណ៍កាលពីថ្ងៃសៅរ៍ពីសម្ព័ន្ធមិត្តអឺរ៉ុប ជិតពីរឆ្នាំបន្ទាប់ពីការស្លាប់របស់លោក Navalny បាននិយាយថា ទីក្រុងមូស្គូមានមធ្យោបាយ ហេតុផល និងឱកាសដើម្បីចាក់ថ្នាំពុលនៅពេលដែលលោក Navalny បានស្លាប់នៅក្នុងពន្ធនាគារ៕