នគរបាលអាល្លឺម៉ង់បាននិយាយថា មនុស្សប្រហែល ២០ម៉ឺននាក់បានចូលរួមបាតុកម្មប្រឆាំងនឹងរដ្ឋាភិបាលអ៊ីរ៉ង់នៅទីក្រុងមុយនិច កាលពីថ្ងៃសៅរ៍១៤ កុម្ភៈ ខណៈក្រុមមេដឹកនាំពិភពលោកបានប្រមូលផ្តុំគ្នានៅក្បែរនោះសម្រាប់សន្និសីទសន្តិសុខ។

ក្រុមបាតុករគាំទ្ររាជានិយមបានប្រមូលផ្តុំគ្នានៅទីលានពិព័រណ៍ Theresienwiese ក្នុងប្រទេសអាល្លឺម៉ង់ ដោយថ្កោលទោសការដឹកនាំរបស់សាធារណរដ្ឋអ៊ីស្លាមអ៊ីរ៉ង់បន្ទាប់ពីការបង្ក្រាបដ៏សាហាវលើចលនាការតវ៉ាទូទាំងប្រទេសក្នុងខែមករា២០២៦នេះ ។

ក្រុមសិទ្ធិមនុស្សបានរាយការណ៍ថា អ្នកតវ៉ារាប់ពាន់នាក់ត្រូវបានសម្លាប់នៅក្នុងប្រទេសអ៊ីរ៉ង់ ។

ហ្វូងមនុស្សបានចូលរួមក្នុងការស្រែកគាំទ្រលោក Reza Pahlavi ជាកូនប្រុសរបស់អតីតមេដឹកនាំអ៊ីរ៉ង់លោក Mohammad Reza Pahlavi ត្រូវបាននិរទេសខ្លួន ដោយមនុស្សជាច្រើនបានគ្រវីទង់ ដែលមានរូបសត្វតោ និងព្រះអាទិត្យ ឆ្នូតពណ៌បៃតង ស និងក្រហម ជានិមិត្តរូបនៃរាជានិយមដែលត្រូវបានផ្តួលរំលំនៅឆ្នាំ ១៩៧៩។ 

ការជួបជុំគ្នាដែលបានអំពាវនាវឱ្យមានសកម្មភាពអន្តរជាតិប្រឆាំងនឹងទីក្រុងតេអេរ៉ង់ក៏ត្រូវបានកើតឡើងផងដែរនៅទីក្រុងតូរ៉ុនតូ របស់ប្រទេសកាណាដា និងទីក្រុង ឡូសអាន់ជឺឡេស សហរដ្ឋអាមេរិក កាលពីថ្ងៃសៅរ៍ ៕