គណៈរដ្ឋមន្ត្រីសហភាពថ្មីរបស់ប្រទេសបង់ក្លាដែស គ្រោងនឹងស្បថចូលកាន់តំណែងនៅថ្ងៃទី១៧ ខែកុម្ភៈ បន្ទាប់ពីគណបក្សជាតិនិយមបង់ក្លាដែស (BNP) របស់លោក Tarique Rahman ទទួលបានជ័យជម្នះយ៉ាងធំធេងនៅក្នុងការបោះឆ្នោតសភាលើកទី១៣។

លោក Tarique Rahman នឹងស្បថចូលកាន់តំណែងជានាយករដ្ឋមន្ត្រីបង់ក្លាដែសនៅថ្ងៃចន្ទ១៦កុម្ភៈ រួមជាមួយគណៈរដ្ឋមន្ត្រីរបស់លោក។ ក្រុមមេដឹកនាំអាស៊ីខាងត្បូងត្រូវបានអញ្ជើញឱ្យចូលរួមពិធីស្បថចូលកាន់តំណែងរបស់លោក Rahman និងគណៈរដ្ឋមន្ត្រីរបស់លោក។

នាយករដ្ឋមន្ត្រីថ្មី និងសមាជិកដទៃទៀតនៃគណៈរដ្ឋមន្ត្រីរបស់ខ្លួន ជាធម្មតាធ្វើសច្ចាប្រណិធាននៅក្នុងសាល Durbar នៃវិមានប្រធានាធិបតីបង់ក្លាដែស Bangabhaban។ ទោះជាយ៉ាងណាក៏ដោយ លើកនេះ ពិធីស្បថចូលកាន់តំណែងនឹងត្រូវធ្វើឡើងនៅសភាជាតិ Jatiya Sangsad Bhavan របស់ប្រទេសបង់ក្លាដែស។

គណបក្ស BNP ទទួលបានសំឡេងគាំទ្រ២០៩ អាសនៈនៅក្នុងសភា House of the Nation ដែលមានអាសនៈសរុប៣០០ ដោយឆ្លងផុតយ៉ាងងាយស្រួលសម្រាប់សំឡេងភាគច្រើនដាច់ខាត។ 

ការបោះឆ្នោតសភាដែលបានធ្វើឡើងកាលពីថ្ងៃព្រហស្បតិ៍១២កុម្ភៈ គឺជាការបោះឆ្នោតលើកដំបូងរបស់ប្រទេសបង់ក្លាដែសចាប់តាំងពីការបះបោរដែលជំរុញដោយចលនា Gen Z កាលពីឆ្នាំ ២០២៤ ដែលបានផ្តួលរំលំនាយករដ្ឋមន្ត្រីលោកស្រី Sheikh Hasina និងនាំឲ្យមានមនុស្សជាច្រើនបានស្លាប់ក្នុងការបង្ក្រាបដោយហិង្សា៕