ប្រធានាធិបតី លោក Volodymyr Zelenskyy បាននិយាយកាលពីថ្ងៃអាទិត្យ ទី១៥ ខែកុម្ភៈ ថា អ៊ុយក្រែនបានព្រមព្រៀងលើកញ្ចប់ជំនួយថ្មីផ្នែកថាមពលនិងយោធា ជាមួយសម្ព័ន្ធមិត្តសហភាពអឺរ៉ុប នៅមុនខួបលើកទី៤ នៃការឈ្លានពានទ្រង់ទ្រាយធំរបស់រុស្ស៊ីនៅថ្ងៃទី២៤ ខែកុម្ភៈ។

ទីក្រុងគីវ មានបំណងប្រមូលការគាំទ្រក្នុងចំណោមដៃគូនានា ខណៈខ្លួនកំពុងព្យាយាមទប់ទល់ទៅនឹងការរុលទៅមុខរបស់រុស្ស៊ីនៅសមរភូមិ និងការវាយប្រហារតាមអាកាសលើប្រព័ន្ធថាមពលរបស់ខ្លួន ខណៈស្ថិតនៅក្រោមសម្ពាធរបស់សហរដ្ឋអាមេរិកដើម្បីចរចាសន្តិភាព។ លោក Zelenskyy បានសរសេរនៅលើបណ្តាញ X ថា «នៅក្នុងទីក្រុង Munich យើងបានឯកភាពជាមួយមេដឹកនាំជាច្រើននៃទម្រង់ទីក្រុងប៊ែរឡាំងលើកញ្ចប់ជំនួយថាមពលនិងយោធាជាក់លាក់សម្រាប់អ៊ុយក្រែន នៅត្រឹមថ្ងៃទី២៤ ខែកុម្ភៈ»។ លោក Zelenskyy បាននិយាយបន្ទាប់ពីកិច្ចប្រជុំនៃអ្វីដែលគេហៅថាទម្រង់ទីក្រុងប៊ែរឡាំងរបស់មេដឹកនាំអឺរ៉ុបប្រហែលជាងដប់រូបនៅទីក្រុងMunich ថា លោកសង្ឃឹមថានឹងទទួលបានការគាំទ្រថ្មី រួមទាំងមីស៊ីលការពារដែនអាកាសផងដែរ។ លោកបាននិយាយបន្ថែមថា «ខ្ញុំអរគុណចំពោះដៃគូសម្រាប់ការត្រៀមខ្លួនជួយដល់ពួកយើង ហើយយើងពឹងផ្អែកលើការដឹកជញ្ជូនទាំងអស់ដែលទៅដល់ក្នុងពេលយ៉ាងឆាប់រហ័ស»។

ការវាយប្រហាររបស់រុស្ស៊ីទៅលើទីក្រុងធំៗដូចជាទីក្រុងគីវបានបំផ្លាញហេដ្ឋារចនាសម្ព័ន្ធថាមពលរបស់អ៊ុយក្រែន ដោយធ្វើឱ្យប្រជាជនរាប់លាននាក់គ្មានអគ្គិសនីប្រើប្រាស់ក្នុងពេលដែលអាកាសធាតុចុះត្រជាក់ខ្លាំង។ លោក Zelenskyy បាននិយាយបន្ថែមថា រុស្ស៊ីបានបង្ហោះយានដ្រូនវាយប្រហារប្រហែល ១.៣០០គ្រឿង គ្រាប់បែកតាមអាកាសស៊ីបគោលដៅ១.២០០គ្រាប់ និងមីស៊ីលបាលីស្ទីករាប់សិបគ្រាប់ទៅលើប្រទេសអ៊ុយក្រែនក្នុងរយៈពេលមួយសប្តាហ៍កន្លងទៅនេះ។