ទីភ្នាក់ងារសារព័ត៌មាន Fars របសអ៊ីរ៉ង់ បានរាយការណ៍ថា អ្នកការទូតជាន់ខ្ពស់របស់អ៊ីរ៉ង់ លោក Hamid Ghanbari បាននិយាយកាលពីថ្ងៃអាទិត្យ (១៥ កុម្ភៈ) ថា អ៊ីរ៉ង់កំពុងតែស្វះស្វែងរកកិច្ចព្រមព្រៀងនុយក្លេអ៊ែរជាមួយអាមេរិក ដែលផ្តល់អត្ថប្រយោជន៍សេដ្ឋកិច្ចសម្រាប់ភាគីទាំងពីរ និងបង្ហើបពីលទ្ធភាពនៃកិច្ចព្រមព្រៀងលើថាមពល រ៉ែ និងយន្តហោះផងដែរ ត្រឹមតែប៉ុន្មានថ្ងៃប៉ុណ្ណោះមុនការចរចាជុំទីពីររវាងទីក្រុងតេអេរ៉ង់ និងទីក្រុងវ៉ាស៊ីនតោន គ្រោងធ្វើឡើងនៅសប្ដាហ៍នេះ។

កាលពីថ្ងៃសុក្រសប្ដាហ៍មុន ប្រភពបានប្រាប់សារព័ត៌មានរ៉យទ័រថា គណៈប្រតិភូទីក្រុងវ៉ាស៊ីនតោន រួមទាំងប្រេសិតជាន់ខ្ពស់អាមេរិក គឺលោក Steve Witkoff និងលោក Jared Kushner នឹងជួបក្រុមមន្រ្តីអ៊ីរ៉ង់ នៅទីក្រុងហ្សឺណែវ នាថ្ងៃអង្គារ ទី១៧ ខែកុម្ភៈ ស្អែកនេះ ហើយក្រោយមក មន្រ្តីជាន់ខ្ពស់អ៊ីរ៉ង់ក៏បានបញ្ជាក់ជាផ្លូវការពីផែនការនៃជំនួបមួយនេះ។

អ៊ីរ៉ង់និងអាមេរិក បានបន្តកិច្ចចរចាឡើងវិញនៅដើមខែកុម្ភៈនេះ ដើម្បីដោះស្រាយជម្លោះអស់ជាច្រើនទសវត្សរ៍របស់ពួកគេលើកម្មវិធីនុយក្លេអ៊ែររបស់ទីក្រុងតេអេរ៉ង់ និងបញ្ចៀសការប្រឈមមុខដាក់គ្នាខាងយោធាជាថ្មី។ មន្ត្រីអាមេរិកបានប្រាប់រ៉យទ័រថា ទីក្រុងវ៉ាស៊ីនតោនបានបញ្ជូននាវាផ្ទុកយន្តហោះគ្រឿងទីពីរទៅកាន់តំបន់មជ្ឈិមបូព៌ា ហើយកំពុងត្រៀមលក្ខណៈសម្រាប់លទ្ធភាពនៃយុទ្ធនាការយោធាជាបន្តបន្ទាប់ ប្រសិនបើកិច្ចចរចាមិនទទួលបានជោគជ័យ។

រដ្ឋមន្ត្រីការបរទេសអាមេរិក លោក Marco Rubio បានថ្លែងក្នុងសន្និសីទសារព័ត៌មានមួយថា លោកប្រធានាធិបតី Donald Trump បញ្ជាក់ច្បាស់ហើយថា លោកចង់បានការទូត និងដំណោះស្រាយដោយការចរចា ប៉ុន្តែក៏ប្រមុខការទូតរូបនេះក៏បាននិយាយថា «ពុំមាននរណាម្នាក់អាចធ្វើកិច្ចព្រមព្រៀងជោគជ័យជាមួយអ៊ីរ៉ង់បានទេ ប៉ុន្តែសហរដ្ឋអាមេរិកនឹងព្យាយាម»។

អ៊ីរ៉ង់បានគំរាមវាយប្រហារមូលដ្ឋានទ័ពអាមេរិកនៅមជ្ឈិមបូព៌ា ប្រសិនបើខ្លួនរងការវាយប្រហារដោយកងកម្លាំងអាមេរិក ប៉ុន្តែមន្រ្តីអ៊ីរ៉ង់នៅថ្ងៃអាទិត្យ ហាក់បង្ហាញជំហរផ្សះផ្សាជាងមុន។ លោក Hamid Ghanbari អនុប្រធានទទួលបន្ទុកការទូតសេដ្ឋកិច្ចនៃក្រសួងការបរទេសអ៊ីរ៉ង់ បាននិយាយថា «ដើម្បីភាពស្ថិតស្ថេរនៃកិច្ចព្រមព្រៀង ជារឿងមានសារៈសំខាន់ណាស់ដែលអាមេរិកក៏ទទួលបានអត្ថប្រយោជន៍ក្នុងតំបន់ដែលមានផលចំណេញសេដ្ឋកិច្ចខ្ពស់ និងរហ័សផងដែរ»៕