នៅក្នុងសន្និសីទសន្តិសុខទីក្រុង Munich នៅចុងសប្តាហ៍កន្លងទៅ លោកស្រី Ursula von der Leyen ប្រធានគណៈកម្មការអឺរ៉ុប បានឆ្លុះបញ្ចាំងពីអារម្មណ៍នៃការផ្លាស់ប្តូរយ៉ាងជ្រាលជ្រៅក្នុងចំណោមមេដឹកនាំអឺរ៉ុប ដោយនិយាយថា «បន្ទាត់ខ្លះត្រូវបានឆ្លងកាត់ ដែលមិនអាចត្រឡប់ថយក្រោយបានទេ» ដែលនេះបង្ហាញពីបំណងពឹងផ្អែកតិចជាងមុនលើវិស័យការពារជាតិអាមេរិក។

ទំនាក់ទំនងអន្តរអាត្លង់ទិកត្រងភាពតានតឹងរួចទៅហើយក្នុងពេលមួយឆ្នាំកន្លងមកនេះ ដោយការវិលត្រឡប់របស់លោក Donald Trump ទៅកាន់សេតវិមាន។ ប៉ុន្តែការជំរុញរបស់ប្រធានាធិបតីអាមេរិករូបនេះក្នុងការគ្រប់គ្រងកោះហ្រ្គីនលែន បានបង្កើនការសង្ស័យរបស់អឺរ៉ុបយ៉ាងខ្លាំង អំពីការប្តេជ្ញាចិត្តរបស់ទីក្រុងវ៉ាស៊ីនតោន ក្នុងការការពារទ្វីបនេះតាមរយៈសម្ព័ន្ធយោធាណាតូ។

លោក Marco Rubio រដ្ឋមន្ត្រីការបរទេសអាមេរិក បានផ្តល់ការធានាឡើងវិញមួយចំនួនដល់អឺរ៉ុប ក្នុងសុន្ទរកថាសន្និសីទរបស់លោក។ លោក Rubio បាននិយាយថា អាមេរិកចង់ធ្វើការជាមួយអឺរ៉ុប និងបានប្រើសម្លេងកក់ក្តៅជាងអនុប្រធានាធិបតី JD Vance កាលពីឆ្នាំមុន។ ប៉ុន្តែលោកក៏បានរិះគន់ដំណើរនយោបាយថ្មីៗនេះរបស់អឺរ៉ុប ហើយមិនបានលើកពីណាតូ រុស្ស៊ី ឬសង្គ្រាមរបស់ទីក្រុងមូស្គូ នៅអ៊ុយក្រែននោះទេ។

ដោយសង្គ្រាមជិតចូលដល់ឆ្នាំទីប្រាំរបស់ខ្លួនទៅហើយ ហើយទីក្រុងមូស្គូត្រូវបានមើលឃើញថាជាការគំរាមកំហែងកាន់តែខ្លាំងឡើងដោយប្រទេសជិតខាងនៅអឺរ៉ុបរបស់ខ្លួន បណ្ដាមេដឹកនាំមកពីទ្វីបអឺរ៉ុបបានប្រកាសថា ពួកគេនឹងពន្លឿនកិច្ចប្រឹងប្រែងដើម្បីជំរុញការការពារផ្ទាល់ខ្លួន និងពឹងផ្អែកតិចជាងមុនលើសហរដ្ឋអាមេរិក។ មេដឹកនាំអាល្លឺម៉ង់ បារាំង និងចក្រភពអង់គ្លេស បានប្រកាសការប្តេជ្ញាចិត្តរបស់ពួកគេនៅទីក្រុង Munich ក្នុងការក្លាយជា «សសរស្តម្ភអឺរ៉ុប» ដ៏រឹងមាំមួយនៅក្នុងអង្គការណាតូ៕