បុព្វលោភធានារ៉ាប់រងដុលនៅកម្ពុជា ក្នុងត្រីមាសទី៤ ឆ្នាំ ២០២៥ មានប្រមាណជិត ៨៦ លាន ដុល្លារ​ដោយកើនជាង ១៥% បើធៀបនឹងត្រីមាសទី៤ ឆ្នាំ២០២៤ ខណៈ​ការ​ទូទាត់​សំណង​ទៅ​ឱ្យ​អតិថិជន​មាន​ទឹក​ប្រាក់​ជិត ២៣លានដុល្លារ។ នេះបើយោងតាមទិន្នន័យ​របស់​និយ័តករ​ធានា​រ៉ាប់​រង​កម្ពុជា(IRC)។

ទិន្នន័យ IRC បង្ហាញថា ក្នុងត្រីមាសចុងក្រោយឆ្នាំ២០២៥ ទឹកប្រាក់​បុព្វលាភ​ធានា​រ៉ាប់​រង​នៅ​កម្ពុជា​មានសរុប ៨៥,៨ លានដុល្លារ កើនឡើង ១៥,៣៦% បើធៀបនឹងត្រីមាសទី៤ ឆ្នាំ២០២៤ ដែល​មាន ៧៣,៣៨ លានដុល្លារ។ ក្នុងនោះ បុព្វលាភធានារ៉ាប់រងអាយុជីវិត (Life Insurance) ៥០,៥៥ លានដុល្លារ កើន ២% ពីចំនួន ៤៩,៥២ លានដុល្លារ, និងធានារ៉ាប់រងទូទៅ (ទ្រព្យ​សម្បត្តិ​ សុខភាព អាយុជីវិត អគ្គិភ័យ យានយន្ត វិស្វកម្ម ដឹកញ្ជូន និងហានិភ័យមួយចំនួន) មាន ៣៥,២៥ លានដុល្លារ កើន ៤១,៨% ពី ២៤,៨៥ លានដុល្លារ។

ទន្ទឹមនឹងប្រាក់បុព្វលាភនេះ ក្រុមហ៊ុនធានារ៉ាប់រងនៅកម្ពុជា ក៏បាន​បំពេញ​កាតព្វ​កិច្ច​របស់​ខ្លួន​តាម​រយៈ​ការទូទាត់សំណង (Gross Claim Incurred) ជូនអតិថិជន​ដែល​ជា​ការ​ចូល​រួម​ចំណែក​រក្សា​បាន​នូវ​ស្ថិរភាពហិរញ្ញវត្ថុជូនបុគ្គលជួបហានិភ័យ ឬ​គ្រោះ​ថ្នាក់​ចៃ​ដន្យ​ផ្សេង​ៗ​ក្នុង​ទឹក​ប្រាក់​សរុប​ ២២,៩៦ លានដុល្លារ កើនឡើង ៧,៨៥% បើធៀប​រយៈពេលដូចគ្នាឆ្នាំ២០២៤ ដែលមាន ២១,២៨ លានដុល្លារ។ ក្នុងចំនួននេះ គឺធានារ៉ាប់រងអាយុជីវិត ៩,៦៦ លានដុល្លារ ថយចុះ ៣% ពី​ចំនួន ៩,៩១ លានដុល្លារ និងធានារ៉ាប់រងទូទៅ ១៣,២៩ លានដុល្លារ កើនពី ១៧% ពីចំនួន ១១,៣៧ លានដុល្លារ។

ផ្អែកតាម IRC គឺក្នុងត្រីមាសទី៤ ឆ្នាំ២០២៥ ក្រុមហ៊ុន​ធានា​រ៉ាប់រង​នៅ​កម្ពុជា​ទទួល​បាន​ប្រាក់​ចំណេញ​(Underwriting Gain) ចំនួន ១២,៩៣ លានដុល្លារ កើនឡើង ៧% ធៀប​នឹង​ត្រី​មាស​ទី​៤​ ឆ្នាំ២០២៤៕ អត្ថបទ៖ ធូ វិរៈ