អាជ្ញាធរសុខាភិបាលហ្កាហ្សា បាននិយាយកាលពីថ្ងៃអាទិត្យថា ច្រកឆ្លងកាត់ Rafah ជាមួយប្រទេស អេហ្ស៊ីប កំពុងដំណើរការ ក្រោមរឹតបន្តឹងយ៉ាងតឹងរ៉ឹង ដែលធ្វើឲ្យអ្នកជំងឺរាប់ពាន់នាក់ដែលត្រូវការការព្យាបាលនៅបរទេស ប្រឈមនឹងគ្រោះថ្នាក់។

នៅក្នុងសេចក្តីថ្លែងការណ៍មួយ មន្ត្រីបានលើកឡើងថា ការបើកឡើងវិញដោយផ្នែកនូវច្រកឆ្លងកាត់នេះ នៅថ្ងៃទី ០២ ខែកុម្ភៈ អនុញ្ញាតឲ្យអ្នកធ្វើដំណើរមួយចំនួនតូចប៉ុណ្ណោះ និងការខ្វះកាតព្វកិច្ចមនុស្សធម៌អប្បបរមាដែលមិនបានជួយដល់អ្នកជំងឺ និងអ្នករងរបួសទេ»។

អាជ្ញាធរបាននិយាយថា អ្នកជំងឺជាង ២០.000នាក់ រួមទាំងករណីធ្ងន់ធ្ងរនៃជំងឺមហារីក ជំងឺបេះដូង ខ្សោយតម្រងនោម និងរបួសធ្ងន់ធ្ងរ កំពុងរង់ចាំការព្យាបាលនៅបរទេស។ ពួកគេបានលើកឡើងពី «សក្ខីកម្មដ៏ឃោរឃៅ និងឈឺចាប់» ពីអ្នកជំងឺដែលបានប្រឈមនឹងការពន្យារពេល និងការរឹតបន្តឹង ដែលធ្វើឲ្យ ការឈឺចាប់ខាងរាងកាយ និងផ្លូវចិត្តរបស់ពួកគេកាន់តែអាក្រក់ឡើងៗ។

មន្ត្រីសុខាភិបាលបានអំពាវនាវឲ្យមានការបើកច្រកឆ្លងកាត់ជាអចិន្ត្រៃយ៍ ដោយគ្មានការរឹតត្បិត ការជម្លៀសជាបន្ទាន់នូវអ្នកជំងឺដែលឈឺធ្ងន់ធ្ងរ និងការបង្កើនចំនួនអ្នកធ្វើដំណើរ ដើម្បីបំពេញតម្រូវការវេជ្ជសាស្រ្តបន្ទាន់។ ពួកគេបានជំរុញឲ្យអង្គការអន្តរជាតិ និងមនុស្សធម៌ធ្វើអន្តរាគមន៍ ដោយពិពណ៌នាអំពីការទទួលបានការព្យាបាលជាសិទ្ធិមនុស្សជាមូលដ្ឋាន ដែលត្រូវបានការពារដោយច្បាប់អន្តរជាតិ។

សេចក្តីថ្លែងការណ៍នេះ បានបញ្ជាក់ថា៖«ជីវិតអ្នកជំងឺមិនមែនគ្រាន់តែជាស្ថិតិទេ» ដោយព្រមានថា ការរឹតបន្តឹងជាបន្តបន្ទាប់ អាចនាំឲ្យមនុស្សស្លាប់បន្ថែមទៀត»៕