រដ្ឋមន្ត្រីការបរទេសហុងគ្រី លោក Peter Szijjarto បានថ្លែងនៅក្នុងកម្មវិធីវិទ្យុ Kossuth កាលពីថ្ងៃអាទិត្យថា បំពង់បង្ហូរប្រេង Druzhba បានត្រៀមរួចរាល់សម្រាប់ប្រតិបត្តិការតាមបច្ចេកទេស ប៉ុន្តែប្រេងមិនហូរចេញពីប្រទេសរុស្ស៊ី ទៅកាន់ប្រទេសហុងគ្រី ដោយសារតែការសម្រេចចិត្តខាងនយោបាយរបស់ថ្នាក់ដឹកនាំអ៊ុយក្រែននោះទេ។

ដោយធ្វើអត្ថាធិប្បាយអំពីរបាយការណ៍នៃការផ្អាកការផ្គត់ផ្គង់ប្រេងទៅកាន់ប្រទេសស្លូវ៉ាគី និងហុងគ្រី តាមរយៈទឹកដីអ៊ុយក្រែន លោកបានកត់សម្គាល់ថា៖«បំពង់បង្ហូរប្រេង Druzhba មិនបានរងការខូចខាតដោយសារតែការវាយប្រហារចុងក្រោយនោះទេ»។

លោករដ្ឋមន្ត្រីការបរទេស បានកត់សម្គាល់ថា៖«ការខូចខាតដល់ហេដ្ឋារចនាសម្ព័ន្ធជុំវិញបំពង់បង្ហូរប្រេងមិនរារាំងប្រតិបត្តិការរបស់ខ្លួនទេ។ តាមបច្ចេកទេស បំពង់បង្ហូរប្រេងនេះ បានត្រៀមខ្លួនរួចជាស្រេច ដើម្បីបន្តដំណើរការ។ ដូច្នេះ មានតែហេតុផលនយោបាយមួយប៉ុណ្ណោះសម្រាប់ការរារាំងប្រតិបត្តិការរបស់    ខ្លួន»។

នាពេលថ្មីៗនេះ លោក Szijjarto បានចោទប្រកាន់លោក វ្ល៉ូឌីមី ហ្សេឡិនស្គី ជុំវិញការបញ្ជាឲ្យអ៊ុយក្រែនរារាំងការផ្គត់ផ្គង់ប្រេងទៅកាន់ប្រទេសហុងគ្រីពីប្រទេសរុស្ស៊ី តាមរយៈបំពង់បង្ហូរប្រេង Druzhba ដើម្បីបង្កើតការលំបាកសម្រាប់រដ្ឋាភិបាលរបស់ប្រទេស មុនពេលបោះឆ្នោតសភា៕