រដ្ឋមន្ត្រីការបរទេសចក្រភពអង់គ្លេស លោកស្រី Yvette Cooper បាននិយាយកាលពីថ្ងៃអាទិត្យថា ចក្រភពអង់គ្លេស នឹងពិចារណាអំពី «ការបង្កើនទណ្ឌកម្ម» ប្រឆាំងនឹងរុស្ស៊ី បន្ទាប់ពីការរកឃើញពីរដ្ឋអឺរ៉ុបចំនួន ៥ ថា មេដឹកនាំប្រឆាំង លោក Alexei Navalny ត្រូវបានសម្លាប់ដោយសារធាតុពុលពីស្បែកកង្កែប នៅក្នុងពន្ធនាគាររុស្ស៊ី។  

លោកស្រី Cooper បានប្រាប់សារព័ត៌មាន BBC ពីសន្និសីទសន្តិសុខទីក្រុងមុយនិច ជាកន្លែងដែលចក្រភពអង់គ្លេស បារាំង អាល្លឺម៉ង់ ហូឡង់ និងស៊ុយអែត បានប្រកាសពីការរកឃើញថា រដ្ឋរុស្ស៊ី គឺជាជនសង្ស័យសំខាន់សម្រាប់ការបំពុលលោក Navalny កាលពីពីរឆ្នាំមុនថា៖«យើងបន្តពិនិត្យមើលសកម្មភាពសម្របសម្រួល រួមទាំងការបង្កើនទណ្ឌកម្មលើរបបរុស្ស៊ី»។

លោក Navalny ដែលជាអ្នករិះគន់ឥតឈប់ឈរចំពោះលោកប្រធានាធិបតី វ្ល៉ាឌីមៀ ពូទីន បានស្លាប់នៅក្នុងពន្ធនាគាររុស្ស៊ីក្នុងស្ថានភាពអាថ៌កំបាំង នៅថ្ងៃទី ១៦ ខែកុម្ភៈ ឆ្នាំ ២០២៤ ខណៈពេលដែលកំពុងជាប់ពន្ធនាគាររយៈពេល ១៩ ឆ្នាំ។

ប្រទេសអឺរ៉ុបទាំង ៥ កាលពីថ្ងៃសៅរ៍ បាននិយាយថា ជាតិពុលដ៏សាហាវមួយប្រភេទដែលត្រូវបានរកឃើញនៅក្នុងស្បែកកង្កែបអេក្វាឌ័រ ត្រូវបានរកឃើញនៅលើការវិភាគនៅមន្ទីរពិសោធន៍ទៅលើសំណាក         ពីសាកសពរបស់លោក។

លោកស្រី Cooper បានប្រាប់សារព័ត៌មាន Sky News ថា ជាតិពុលនេះ ក៏អាចត្រូវបានផលិតដោយសំយោគផងដែរ៕