ជីវិតកំពុងវិលត្រឡប់ទៅធម្មតាវិញជាបណ្តើរៗនៅតាមដងផ្លូវក្នុងទីក្រុង Dilling ជាទីក្រុងធំបំផុតទីពីរនៅក្នុងរដ្ឋ Kordofan ខាងត្បូង បន្ទាប់ពីកងទ័ពស៊ូដង់ បានបំបែកការហ៊ុមព័ទ្ធដ៏ខ្លាំងក្លា ដែលបានធ្វើឱ្យតំបន់នេះនៅឯកោរយៈពេលជាងពីរឆ្នាំ។

រយៈពេលជាច្រើនខែ ទីក្រុងនេះត្រូវបានហ៊ុមព័ទ្ធដោយកងកម្លាំងគាំទ្ររហ័សយោធាប៉ារ៉ា (RSF) និងចលនារំដោះប្រជាជនស៊ូដង់ខាងជើង ដោយកាត់ផ្តាច់បណ្តាញផ្គត់ផ្គង់សំខាន់ៗ និងធ្វើឱ្យជនស៊ីវិលជាប់គាំងក្នុងវិបត្តិមនុស្សធម៌ធ្ងន់ធ្ងរ។

ខណៈដកចេញការបិទផ្លូវ បានអនុញ្ញាតឱ្យមានលំហូរទំនិញម្តងទៀត ដោយអាជ្ញាធរតំបន់និងអ្នកស្រុកបាននិយាយថា ទីក្រុងនេះនៅតែស្ថិតនៅក្រោមការគំរាមកំហែងពីការវាយប្រហារដោយយានដ្រូន។ លោក Hisham Uweit អ្នកសារព័ត៌មាន Al Jazeera អារ៉ាប់ ដែលរាយការណ៍ពីទីក្រុង Dilling បានពណ៌នាអំពីទីក្រុងនោះថា «កំពុងងើបឡើងវិញជាបណ្តើរៗ» ពីភាពជាប់គាំងសេដ្ឋកិច្ច។

លោក Uweit និយាយថា «រយៈពេលជាងពីរឆ្នាំមកហើយ ស្ថានភាពនៃការហ៊ុមព័ទ្ធធ្ងន់ធ្ងរត្រូវបានដាក់ទៅលើទីក្រុងនេះ។ សកម្មភាពធ្វើដំណើរបានបាត់បង់ ទំនិញក៏បានបាត់ ហើយជីវភាពរស់នៅបានស្ថិតក្នុងស្ថានភាពចង្អៀត។ 

ផលប៉ះពាល់ភ្លាមៗនៃការរុលទៅមុខរបស់កងទ័ព អាចមើលឃើញនៅក្នុងទីផ្សារក្នុងស្រុក ដែលភាគច្រើនត្រូវបានបិទក្នុងអំឡុងពេលបិទផ្លូវ។ ផលិតផលស្រស់ៗ ដែលអវត្តមានជាច្រើនខែ បានចាប់ផ្តើមលេចឡើងវិញនៅក្នុងហាងទំនិញ។